Тілсіз жауды ауыздықтауға күш жеткілікті
Жедел штаб сағат 5 қыркүйек, сағат 12:00-де «Бағаналы ауылын өрттен қорғап қалу үшін өрт сөндіру жасақтары мен арнайы техника күштері қайта топтастырылды. Орманның 4-ші және 8-ші кварталында өрт болып жатыр. Жергілікті атқарушы органдар Қазанбасы ауылдық округіне қарасты Бағаналы елді мекенінің 11 тұрғынын эвакуациялады. Олардың ішінде 2 бала бар. Өрт сөндіру жұмыстарына 50 техника, Ұлттық ұлан әскерилері, еріктілер мен ауыл тұрғындары тартылды», деп хабарлады.
«Қазіргі таңда 6 ұшақ өрт сөндіру жұмыстарына тартылған. Оның төртеуі Төтенше жағдайлар министрлігіне, екеуі Қорғаныс министрлігіне тиесілі, күш жеткілікті. Тек қазір су көздерін іздеуде қиындықтар сезілуде. Қажет болса, су таситын көліктермен қосымша су жеткіземіз. Өйткені ағаш басындағы жалынды мейлінше тежеу үшін тікұшақтарды уақтылы сумен қамтамасыз ету керек. Осылайша санаулы күндердің ішінде өртті толықтай ауыздықтау жоспарланып отыр», деді Төтенше жағдайлар министрі Юрий Ильин.
Өршеленіп кеткен өрттің тек Әулиекөл өңіріне ғана емес, басқа аудандарға да тигізген зияны орасан. Мысалы, осы аптада Лисаков қаласының іргесіндегі үлкен саябақ өртке оранды. Қостанай қаласындағы бірнеше бизнес нысаны жанып кетті.
Қарабалық, Ұзынкөл аудандарындағы орман учаскелері мен құрғақ шөп алқаптарын өрт шалып, көптің күшімен дер кезінде сөндірілді. Қарасу ауданына қарасты Люблинск ауылындағы алты үй айналасы бір жарым сағаттың ішінде қызыл жалынға оранып, түгел жанып кетті. Люблинск ауылдық округінің әкімі Андрей Максимовтің айтуынша, тілсіз жау 5 қыркүйек күні таңертең толықтай тізгінделген.
– Қазір зардап шеккен алты отбасы туыстарының үйіне орналастырылды. Бұл отбасылардың бірінің бір учаскеде екі үйі болған. Оның біреуі жанып кеткенімен, екінші үй аман. Қазір біз өрттен зардап шеккендердің мүлкін тізімдеп, тезірек өтемақы беру жұмыстарымен айналысып жатырмыз. Таяу арада өрттен келген шығын мөлшерін есептеп, көмек көрсетуіміз керек. Кейбір тұрғындардың құжаттары өртеніп кеткен. Бұл да біраз қиындық туғызады, – деді әкім.
Гуманитарлық көмек көрсетілуде
Әулиекөл ауылындағы «Болашақ» спорт кешенінде өрттен зардап шеккен тұрғындарға гуманитарлық көмек көрсетіліп жатыр. Төтенше жағдай министрлігінің әскери күштері Әулиекөлдің іргесіндегі Новонежен ауылында палаткалар тігіп, баспанасыз қалғандарды орналастыруда. Мәжіліс депутаттарының бастамасымен Нұр-Сұлтан қаласында да Әулиекөл жұртына жылу жиналып жатқанын естідік. Республикалық жедел штаб өкілдері өрт кезінде зардап шеккендердің құжаттары кезектен тыс қалпына келтірілетінін мәлімдеді.
– Табиғи апаттан зардап шеккен аудандардағы халыққа қызмет көрсету бөлімдерінің қызметкерлері көші-қон полициясының өкілдерімен бірге өрт сөндірушілерге көмек көрсетуге дайын. Жеке басты куәландыратын құжаттарды, сондай-ақ жылжымалы және жылжымайтын мүлікке қатысты құжаттарды қалпына келтіру үшін тұрғындар ХҚО-ға жүгінуі қажет. Қызметкерлер азаматтарға түскі үзіліссіз құжаттарды рәсімдеуге көмек көрсетуге дайын, зардап шеккен азаматтарды қабылдау кезектен тыс жүзеге асырылады, – дейді Мемлекеттік корпорацияның облыстық филиалының директоры Миржан Жаңабаев.
Ал Еңбек, әлеуметтік қорғау және көші-қон комитеті өрттен зардап шеккен тұрғындарға тиесілі әлеуметтік төлемдерді де аудара бастады.
– Республикалық бюджеттен қыркүйек айында берілетін зейнетақы, жәрдемақы бүгін аударылады. Бұл республикалық деңгейде шешілді. Әлеуметтік төлемдер өрттен зардап шеккендерге ғана емес, ауданның бүкіл тұрғындарына, бас-аяғы 8 447 адамға төленеді. Оның ішінде 6 мың зейнеткер, 388 көпбалалы ана бар, – деді аталмыш комитетке қарасты облыстық департамент басшысы Айнұр Сатаева. Мұның сыртында, Еңбек және халықты әлеуметтік қорғау министрлігі жұмыссыз қалғандарға ақылы демалыс жарияламақ.
Сондай-ақ облыстық полиция департаментінің қызметкерлері де бір күндік жалақысын өрт кезінде зардап шеккендерге көмек көрсететін бірыңғай қоғамдық қорға аударады.
– Облыстың жеке құрамы Әулиекөл ауданының өрт салдарынан зардап шеккен тұрғындарына көмек көрсетеді. Біз кез келген қолдауды қажет ететін жерлестерімізге көмектесуді өзіміздің азаматтық парызымыз деп санаймыз, – деген мәлімет таратты.
Қайырымдылық шараларынан Qazaq Oil да тыс қалған жоқ. Аталмыш компания Қостанай облысында өртті сөндіруге қатысқан техникаларға 50 миллион теңгеге тегін дизель отынын берді. «Құрметті жерлестер! «Qazaq Oil» ЖҚС ұлттық желісінің ұжымы Қостанай облысындағы өрт салдарынан қасіретке душар болған жандарға шынайы қолдау білдіретінін жеткізеді. Біз сіздермен біргеміз!», деп жанашырлық танытқан компания ұжымы жұртты сындарлы сәтте сабырлы болуға шақырды.
«Біз біргеміз» қайырымдылық акциясы аясында Әулиекөлге Қостанай ұн комбинаты, «Деп», «Жас қанат» құс фабрикасы сияқты ірі кәсіпорындар да азық-түлік жөнелтіп жатыр.
– Әулиекөл ауданындағы алапат өрттен кейін еліміздің түкпір-түкпірінен көмек ағылып жатыр. Бұл бағытта Қостанай облысының кәсіпкерлері мен облыстық Кәсіпкерлер палатасы өңірлік кеңесінің өкілдері де белсенді жұмыс жүргізуде. Мұндай жағдай ешкімді бейжай қалдырмайды. Қазір өңірдегі жағдайды тұрақтандыру бойынша барлық қажетті шаралар қабылдануда, – деді облыстық кәсіпкерлер палатасының директоры Данияр Күзенбаев.
Д.Күзенбаевтың айтуынша, облыстық кәсіпкерлер палатасы өрттен зиян шеккен бизнес нысандарының шығынын есептеу жұмыстарын жүргізіп жатыр.
Қостанай облысы
