Тәуелсіздікке тарту

Қазақстан тәуелсіздік алған алғашқы жылдарда, басқасын былай қойғанда, халықтың еңбекақысы мен зейнетақысын берудің өзі оңай болмағаны белгілі. Қаржының тапшылығы салдарынан әлеуметтік сала күрделі жағдайға тап болғанын білеміз. Арада ширек ғасыр уақыт өтті, қазір бұл саланың хал-ахуалы қалай? Әлеуметтік саланың бүгінгі тынысын өңірлерден келген төмендегі пікірлерден айқындауға болады. Егемендіктің елең-алаң­ын­да ауылдық жерлерде қиын­­дық болғаны рас. Ауыл­­дан қалаға қа­рай қоныс аудар­ғандар көп бол­ды. Алай­да, Ел­басы Н.Назарбаев­тың сарабдал саясатының арқасын­да бұл қиындықтар артта қал­ды. Шал­ғай­дағы Қарой селосында да оң өзгерістер жүзеге асты. Ауыл­да заманға сай еңселі мектеп бой көтеріп, жаңа оқу құралдары­­мен жарақтандырылды. Балабақ­ша жұмыс істейді. Көптен кенеуі кетіп тұрған Мәдениет үйі жөнделіп, ауылдықтарға қызмет етуде. Сапалы байланыс жүйесі бар. Ең бастысы, ауыз су мәселесі оң шешілді. Қазір таза су әр үйдің ауласында. Бұған ауылдық­­тар дән риза. Бұл бюджетке 37 мил­лион теңгеге түсті. Енді игілігін жұрт көріп отыр. Жаңа дәрігер­лік амбулатория пайдалану­ға берілді. Бір сөзбен айтқан­да, ха­лық Елбасының алыс ауылдарды дамытуға баса назар аударып отыр­ғанын айқын сезінуде. Біздің аудан – ең шалғай аудандардың бірі. Жетпіс жыл бойы қатты жамылғы жолы бол­маған ауданға асфальт жол келді. Күні кеше ғана аудан орталығына газ берілді. Осының бәрі тәуелсіздіктің тартуы. Зоя БОЗШИНА, Ойыл ауданының тұрғыны, Қараой мектеп-балабақшасының кітапханашысы Ақтөбе облысы Ольга ИСАЕВА,

Орал қаласының тұрғыны, әлеуметтік сала қызметінің ардагері

Тәуелсіздіктің алғашқы жылдарында әлеуметтік салада қызмет жасадым. Ыстығы мен суығын өз басымнан өткергендіктен, сол уақыттағы жағдай мен мемлекет тарапынан халыққа қандай әлеуметтік көмек болғаны көз алдымда. Елбасының тапсырмасына орай, атаулы әлеуметтік көмек белгіленді. Басқа бірде-бір елде баламасы жоқ, тұрмысы төмен отбасыларға арналған осы бір қаржылық қолдау сол тұста оларға үлкен көмек болды. Қазір де осындай атаулы әлеуметтік-қаржылық қолдау бар, бірақ сол жылдармен салыстырғанда өте аз. Себебі, соң­ғы жылдары республика­­мыз­да жаңа жұмыс орындары кө­бей­ді. Егер тәуелсіздіктің алғашқы жылдарында бір отбасының барлық мүшесі жұмыссыз қалған болса, қазір бұл көрініс келмеске кетті, жұмыссыздар күрт азайды. Батыс Қазақстан облысы Гүлнар ПАРМАНОВА,

Тараз қаласының тұрғыны

2000 жылы Жамбыл облысында бар-жоғы 15 мәдениет үйі мен клуб болған екен, қазір  – 199. Ал 1999 жылы 21 ғана кітапхана болса, бүгінгі таңда – 287. Яғни, қазір Жамбыл өңірінің өнері мен мәдениеті ерекше өркендеді. 545 мәдени мекеме халыққа қыз­мет көрсетіп отыр. Бұл – Тәу­ел­сіздіктің тартуы. Тәуелсіздік туы желбірегелі бері Жамбыл облысында 92 жаңа білім нысаны іске қосылған. Оның 71-і мектеп, 20-сы балабақша, 1-еуі колледж. Осының арқасында 46 тозығы жеткен, 8 үш ауысымды, 10 орын тапшылығы бар, 7 ыңғайластырылған ғимаратта орналасқан мектептер мәселесі шешілді. Тәуелсіздік жылдары тек Та­раз қаласының өзінде 11 мектеп, 56 мектепке дейінгі мекеме, екі мектептен тыс балалар шы­ғармашылығы орталығы, ал­ты денсаулық нысаны, бір мә­де­ниет және алты спорт кешені пай­далануға беріліпті. Әрине, бұл жағ­дайлардың бәрі – Елбасының ел болашағына жасап отырған үлкен қолдауы, қамқорлығы.    Жамбыл облысы