Дін саласына қатысты жауапкершілік күшейеді

Министр Нұрлан Ермек­баевтың айтуынша, аталған ведомство Діни экстремизм мен терроризмге қарсы іс-қи­мыл жөніндегі 2013-2017 жыл­дарға арналған мемлекеттік бағдар­ламаны іске асыруға белсене ат­салысуда. Қазіргі таңда 2017-2020 жылдарға арнал­ған мем­лекеттік бағдар­лама әзір­ленгенін де атап өткен жөн.

– Теріс идеологияларға қар­сы күреске мемлекеттік және қоғамдық ресурстар жұмыл­ды­рылды. Бірінші рет Үкіметтің іріткі салушы діни ағымдарға қатысты ұстанымы БАҚ-тар­да ашық жарияланды. Қоғам бұл ұстанымды оң қабылдады. Әлеуметтік сауалнамалар бо­йынша, қазақстандықтардың 85 пайызы теріс идеологиялардың насихатталуына қарсы екендігі белгілі болды, – деді министр.

Министр діни саладағы ахуалды реттеу, тиісті ұсыныс­тар әзірлеу мақсатында ве­домство­аралық комиссия құ­рыл­ғанын жеткізді. Бұл комиссия мемлекеттік органдар мен діни бірлестіктердің діни тұрақтылықты қамтамасыз етуге бағытталған жұмыстарын үйлестірумен айналысады.

Сонымен қатар, Дін іс­тері және азаматтық қоғам ми­нистр­лігі Қазақстан мұсыл­мандарының діни бас­қар­масы­мен арада бірлесіп жұмыс істеу туралы меморандум жасас­қан. Басқа да діни бірлес­тік­тер­мен арада байланыс жолға қойылған. Қазақстан мұсыл­мандарының діни басқармасы мешіттегі бірыңғай әдеп ере­жесін әзірлеген. Бұл да халық ара­сында жиі талқыланған өзекті мәселелердің бірі болатын. Бір айта кетерлігі, осы жиында атап өтілгендей, мемлекет таза діни қа­ғи­далар мен діни бір­лес­тік­тер­дің ғұрыптарына араласпайды.

Министрлік тарапынан діни материалдардың таралуына мониторинг жасау жолға қойы­лыпты. Осылайша, өткен жылы 11 мыңға жуық сайттың мате­риалдары зерделеніп, оның мың жарымға жуығынан аран­датушылық мазмұндағы кон­тент­тер табылып, бұл сайттар сот шешімімен жабылған.

– Жыл бойы 3 мыңнан астам кітап және баспа өнімдері ны­сан­дары сараптамадан өткі­зілді. 98 материал заңға қай­шы контент деп танылды. Бас бос­тандығынан айыру орын­дары­ның барлық кітапхана қорын­дағы материалдарға да сараптама жүргізіліп, деструктивті мазмұндағы 13 кітап анықталды, – деді Н.Ермекбаев.

Бүгінде министрлік «Діни қызметтер және діни бірлес­тік­тер мәселелері жөніндегі кей­бір заңнамалық актілерге өз­гертулер мен толықтырулар енгізу туралы» заң жобасын әзірлеу үстінде. Нұрлан Ермек­баев аталған заң жобасында көзделіп отырған бірқатар негіз­гі нормаларға да тоқталып өтті.

– Қысқаша баяндайтын бол­сам, аталған заң жобасының негізгі нормалары қатарын­да, мәселен, кәмелеттік жасқа толмағандарды діни қызметке тартқаны үшін қолданылатын жауапкершілікті күшейту қарастырылған. Дін саласына қатысты заңнаманы бұзғандар үшін де жауапкершілік күшей­тілуге тиіс. Бұдан бөлек, қоғам тарапынан кәме­лет­ке тол­маған­дарға діни әде­биеттерді сатуға, мемлекеттік қыз­метшілердің жұмыс уақытында діни рәсім­дерге қатысуына шектеу қою ұсынылуда, – деді министр.

Жаңа заң жобасында мис­сионерлік қызметті реттеу, шет ­ел­де діни білім алуды рет­теу жөніндегі нормалар да бар екен. Министр айтып өткен­дей, қо­ғам тарапынан ұсынылған бұл бастамалардың барлығы да ха­лық­пен және сарапшылармен жан-жақты талқыланатын бола­ды. Сол арқылы қоғамның то­лық­қанды әрі объективті пікірін біліп, оны аталған құжатта бе­кі­ту көзделіп отыр. Жиын ба­ры­­сында сөз болғандай, бұл жұ­мыс­­тардың негізгі мақсаты – елі­­міз­дің болашақтағы қауіп­сіз­дігі мен тұрақтылығын сақ­тау­ға бағытталған. Жаңа заң жо­б­асы биылғы жылдың соңына де­йін Парламент Мәжілісіне жі­бері­леді деп жоспарланып отыр.

Арнұр Асқар,

«Егемен Қазақстан»