Қазақстанның Германиядағы елшілігі ашық дәріс ұйымдастырды

Онда Елбасы Нұрсұлтан Назарбаев ұсынған конституциялық реформалар мен «Қазақстанның Үшінші жаңғыруы: жаһандық бәсекеге қабілеттілік» атты Жолдаудың негізгі ережелері түсіндірілді. Бұл туралы Қазақстанның Германиядағы елшілігі хабарлады. 

Шара барысында Қазақстан Рес­публикасының Германия Федера­тив­тік Республикасындағы Төтенше және өкілетті елшісі Болат Нүсіповтің айтуынша, Қазақстанның бүгінге дейін қол жеткізген табыстары еліміздегі саяси жүйені одан әрі жетілдіріп, уақыт талабына сай реформалауға мүмкіндік береді. Конституциялық реформалар аясында билік тармақтары арасында өкі­леттіктерді бөлу Қазақстанның демо­кра­тиялық жолмен дамуына жол ашады.

Жиында Берлин-Бранденбург Прусс қоғамының құрметті пре­зиденті Ф.Чапке және Қазақстан немістері одағының төраға­сы А.Граф сөз сөйлеп, елімізде бо­лып жатқан оң өзгерістер тұрғысында өз ой-пікір­лерін жеткізді.

Жалпы, басқосуда қатысушыларға елімізде жүргізіліп жатқан реформалар барысында шетелдік инвесторларға берілетін мүмкіндіктер, Қазақстанда бизнес ашу мәселесі тұрғысында кеңірек түсіндірілді.

Негізінде, шараға қатысушылар елімізде жүргізіліп жатқан саяси реформалар Қазақстанда демократиялық үдерістерді нығайта түсетінін атап өтті. Сөз сөйлегендердің айтуынша, елдегі билік тармақтары арасында өкі­леттік­терді бөлу қадамы халықтың әл-ауқатын арттыруға, мемлекет экономи­касын дамытуға тікелей ықпал етеді.

Сонымен қатар, неміс сарапшылары Қазақстанда шетелдік ин­вес­торлар үшін жақсы жағдай жаса­лып отырғанына назар аудара келіп, мемлекеттің экономикаға ара­ласуы­ның азаюы және мемлекеттік-жеке­меншіктік әріптестіктің дамуы биз­нестің тынысын аша түсетінін айтты.

Соңында шараға қатысушы азаматтар Қазақстан-Германия қарым-қатынастарының өзекті мәселелерін, басым бағыттарын талқылап, өз ойларын ортаға салды.