Кадр даярлау сапасын арттыру керек
<p>Президент Нұрсұлтан Назарбаевтың 2014 жылдың 1 тамызын­­дағы «Қазақстан Республикасының 2015-2019 жыл­дарға арналған индустриялық-инновациялық дамуының мем­лекеттік бағдарламасын» бекіткен Жарлығында мемлекеттік органдар мен ұйымдардың аумақтық кластерлерге барлық қажетті шараларды жасауы, соның ішінде стратегиялық жобаларды іске асыруы үшін мемлекеттік қаржылық және қаржылық емес көмектер көрсетуі жөнінде айтылған. </p>
Мемлекеттік қолдаудың бір бағыты – білікті кадрлармен қамсыздандыру. Білім беру саласындағы мемлекеттік саясат экономиканы әртараптандыру мен индустрияландырудың қысқа және ұзақ мерзімді міндеттерін шешетін кадрлар даярлауға бағытталған. Сондай-ақ экономиканың өңдеу саласы мамандарын дайындау ісі алға тартылған.
Әрине, білікті мамандар даярлау ісі кадрлар біліктілігін арттырып, сапалы деңгейге көтеретін оқу орындары мен озық бағдарламаларға байланысты. Бұл міндетті шешу ісі білім беру және оқыту бағдарламаларын жетілдірумен қатар, оқу орындарының материалдық-техникалық базасын жақсартуды талап етеді. Аграрлық сектор да осы талаптың үдесінен шығуға талпынып отыр. Президенттің 2017 жылдың 14 ақпанындағы Жарлығымен бекітілген агроөнеркәсіптік кешенді дамыту жөніндегі мемлекеттік бағдарламада да осы саланың оқу орындарын одан әрі жақсарту қажеттігі аталып өткен. Осы құжатта Елбасы ғылым, білім және өндірістің интеграциясын қамтамасыз ету үшін Астанадағы Сәкен Сейфуллин атындағы Қазақ агротехникалық университетінің базасында Агроөнеркәсіп кешені саласында зерттеу университетін құру жөнінде тапсырма берген болатын. Осы міндетті орындау үшін аталмыш оқу орнының материалдық-техникалық базасын нығайту қажеттігі туындауда. Оның бағдарламасы жасалып, іске асырылуы үшін республикалық бюджеттен 2018 жылға 223 млн теңге бөлу қажет болып отыр. Бұл қаражат ғылыми-зерттеу зертханаларын қажетті жарақтармен қамтамасыз ету мәселесін де шешеді.
Өкінішке қарай осы сома Ауыл шаруашылығы министрлігінің 2018 жылға арналған бюджеттік сұранымында орын алмаған. Сол мәселені шешіп, келесі жылдың бюджеттік сұранымына енгізуді өтініп біз Премьер-Министрдің орынбасары – Ауыл шаруашылығы министрі Асқар Мырзахметовтің атына депутаттық сауал жолдадық. Мәселе оң шешімін табар деген үміттеміз.
Жамбыл АХМЕТБЕКОВ,
Мәжіліс депутаты