Вагон «жібіткіш» қондырғы іске қосылды
<p>Еуразиялық Топ (ERG) құрамын­дағы «Қазхром» ТҰК» АҚ филиа­лы – Ақсу ферроқорытпа зауытында қолға алынған жаңа жобаны «ERG коммерциялық орта­лығы» ЖШС және «ТрансКом» ЖШС бірлесе жүзеге асырды.</p> <div> </div>
Іске қосылған инновациялық қондырғы қыс кезінде жүк вагондарында жолда қатып қалған жүктердің түсірілуін жеделдетіп, зауытқа жеткен кезде вагондардың тұрып қалу уақытын азайтатын көрінеді.
– Жалпы, әр кәсіпорында жүк тасушы вагондардың «жібіткіші» болу керек деген мәселе бұрыннан талқыланып келді, – дейді кәсіпорын директоры Сергей Прокопьев. – Шетел кәсіпорындарының тәжірибесі де зерттелді. Өткен күзде нақты шешімге келдік. Солтүстіктің суық ауа райына сай, қондырғыны орналастырудың тиімді орны, құрылымы мен қолданылатын жабдықтың түрі анықталды.
Сөйтіп алғашқы кезегі пайдалануға берілген вагон «жібіткіш» алып қондырғы ішіне бірден 8 жүк вагоны тұратындай мүмкіндік туды. Нәтижесінде, вагон жақтаулары небары жарты сағатта 70оС дейін қызады. Автоматтандырылған бақылау жүйесі қуатты реттеп отырады. Келесі кезекте қондырғы тәулігіне шикізат тиелген 50 жүк вагонын «жібітіп», жобалық қуатында жұмыс істей бастайды. Ерекше қондырғы кәсіпорынның өнімді жұмыс жасауына да аса қажет. Вагондарға тиелген шикізаттың тоқтаусыз жеткізілуі, түсірілуі маңызды. Зауытта жыл сайын 1 миллион тоннадан аса ферроқорытпа өндірілсе, қазір басым бөлігі алыс шетелдерге экспортталуда. Кәсіпорында соңғы бірнеше жылдың ішінде өндірістік, экологиялық және әлеуметтік инвестициялық көптеген жобалар жүзеге асырылып келеді. Зауыт мамандары, жұмысшылары еңбек жетістіктермен бірге, қыс кезінде жолдан келген шикізат тиеген жүк вагондарын «жібіткіш» сияқты инновациялық шешімдерді іздестіру жолында еңбек етуде.
Фарида БЫҚАЙ,
«Егемен Қазақстан»
Павлодар облысы,
Ақсу қаласы