Отбасы академиясы
<p>Қазіргі кезде отбасы құндылықтарын нығайту және демографиялық саясат мәселелерін тереңдету ісінің мәні мен маңызы жоғары. Сонымен бірге бүгінгі отбасын құрған жастар арасында ажырасу деректерінің көптігі алаңдатпай қоймайды. </p> <div> </div>
Мұндай теріс демографиялық көріністің алдын алу мәселелері қоғамдағы жұртшылықты ойландыруға тиіс. Айталық өткен жылы Ақтөбе облысында 7000-ға жуық жұп отбасын құрса, соның 2600-ден астамы ажырасып үлгерген. Сөз жоқ, бұл – өте алаңдатарлық мәселе.
– Ерлі-зайыптылар өзара келісім мен ортақ түсіністікке келе алмай, екі жаққа кеткенде ең алдымен балалар жапа шегеді. Бұл жайт өз кезегінде отбасы проблемалары мен түйіндерін бір жүйе мен ізге келтіруге септігін тигізе алатын арнаулы орталықтың қажет екенін көрсетеді. Сондықтан да биыл өңірде «Отбасы академиясы» жобасы жүзеге асуда. Оның қызметіне бірінші кезекте психолог мамандар мен медиаторларды мейлінше көбірек тарту көзделген, – деді Ақтөбе облысы әкімінің орынбасары Ербол Нұрғалиев.
Оның мәлімдеуінше, оған түрлі түсінбеушіліктер мен келеңсіз жағдайдарға тап болған ерлі-зайыптылар ғана емес, үйленуді немесе тұрмыс құруды ойластырып жүрген болашақ шаңырақ иелері де тартылмақ. Болашақ ата-аналар мектебі де аталған «Отбасылық академиясы» жобасы аясында жұмыс істемек.
Темір ҚҰСАЙЫН,
«Егемен Қазақстан»
АҚТӨБЕ