«Нұршашу» би ансамблі Еуропадан жүлдемен оралды
<p style="text-align: justify;">Жуырда Чехияның астанасы Прага қаласында «Таланттарға сәлем» жобасы аясында XIII халық­аралық балалар фестивалі өтті. Аталған фестивальға елордадағы №54 мектептің талантты оқушылары да қатысқан еді. Оқушыларды бастап барған Мәншүк Мұ­саеваның айтуына қа­рағанда, қаржы бөлу мәсе­лесі қалалық білім бас­қар­масында арнайы қа­ралып, оң шешімін тапты. </p>
Еуропа төріндегі өнер сайысына барған «Нұршашу» би ансамблінің өнерлі қыздары ұлттық би мәнеріндегі шығармаларымен көрермендердің көзайымына айналып, жүлделі екінші орынды жеңіп алды. Бұл фестивальда нағыз жүзден жүйрік, мыңнан тұлпарлар ғана бақ сынады.
«Очерование Богемии» атты балалар мен жасөспірімдер шығармашылығының беделді халықаралық фестивалі 2005 жылдан бері ұйымдастырылып келеді. Осы жолы өнер сайысына әлемнің жеті мемлекетінен 250-ге тарта жасөспірім қатысқан. Олардың ішінде Ресей, Өзбек- стан, Литва, Чехия сынды елдер бар. Қазақстанның намысын қорғаған «Нұршашу» қыздар би ансамблі 12 жылдан бері үміттерін үкілеп келеді екен. Бұл жолғы жеңіс соның нәтижесі.
Топтың көркемдік жетекшісі Мәншүк Мұсаеваның айтуынша, аталмыш фестиваль балалардың ой-өрісінің өсуіне де, ел көріп, жер көріп, талантының ұшталуына да септігін тигізді. «Жеті мемлекеттің ішінде екінші орын алу – біз үшін үлкен жетістік. Алдағы уақытта бұдан да биік белестерді бағындыратынымыз сөзсіз. Мен осы арада білім ұясының басшысына, ұжым мүшелеріне ерекше ризалығымды білдіргім келеді. Айрандай ұйыған ортаның береке-бірлігі болмаса, мұндай жеңіс тұғырынан көрінуіміз екіталай еді», дейді ол.
Мирас АСАН,
«Егемен Қазақстан»