Оразадағы ой: Әли хазіреттің жауабы
<p style="text-align: justify;">Пайғамбардың (с.ғ.с) інісі әрі жалғыз қызы Бәти­маның жары, ислам дүние­сінің төртінші халифасы Әли ибн Тәліп хазіретіге мұсыл­маншылыққа бет бұр­май қасарысқан бір пенде келіп: «Ей, Әли, сендер бұл өмір уақытша сынақ деп жүр­сіңдер, о дүниеде есеп-қисапқа тартыламыз деп қор­қасыңдар, таңнан тұрып намаз оқып, адалдықпен өмір сүреміз деп қиналасыңдар. Осы сендер сеніп жүрген о дүниедегі есеп-қисап болмай қалса не болдыңдар, өкінесіңдер-ау?» дейді.</p>
Сонда Әли хазіреті: «Сіз өте орынды сұрақ қойдыңыз, мен жауап берейін, сіз айтқандай о дүниеде есеп-қисап болмайтын, маһшар күні таразы тартылмайтын болса да менің ұтыларым жоқ. Өйткені таңмен намаз оқып ерте тұрдым, таза ауа жұттым, елден бұрын тірлігіме кірістім, өзіңіз айтқандай ұрлық жасамадым, өтірік айтпадым, соның арқасында елге сыйлы болдым, бейбіт-тыныш өмір сүрдім. Бұдан пайда таппасам, ұтылған түгім жоқ. Ал сіз о дүниеге сенбей, қалауыңызша өмір сүріп жатырсыз. Алда-жалда есеп күні болып, маһшарда таразы тартылып, күнәлар салмақтанса сіз қайтесіз?» деген екен.
Бекен ҚАЙРАТҰЛЫ,
«Егемен Қазақстан»