Павлодарда «Күй-Құдірет» домбырашылар байқауы өтті

Жас домбырашылар жарысы аудан орталығындағы Шәкен Айманов атындағы мектеп-интернатта өтті. Байқаудың алдында Жаяу Мұса атындағы Баянауыл балалар өнер мектебінің Зинұр Ғалымов дирижерлік ететін оркестрі К.Әлдекеновтің «Жаңа ғасыр», Нұрғиса Тілендиевтің «Мұрагер», Құрманғазының «Адай» күйлерін орындап берді. Сондай-ақ Дария Үкібай Жаяу Мұсаның «Баянауыл» әнін шырқады.

Күйшілер үш топта өнер көрсетті. Әр қатысушы үш күй­ден орындады. Бірінші күні «Кіші топ» пен «Жоғары топтың» бірінші кезеңінің қатысушылары толық тыңдалды және «Орта топ» үміткерлерінің жартысы өнерлерін ортаға салды. Бірін­ші сайыс күнінің қоры­тындысы бойынша «Кіші топ» үздіктері мен «Жоғары топ» фи­налистері анықталды. Бірінші күні қатысушылар Дина, Құрманғазы, Әбди, Ақби­кеш, Аққыз, Қыздарбек, Қа­зан­­ғап, Байжігіт, Өскенбай, Сей­­тек, Тәттімбет, Әлшекей, Дәулеткерей секілді композиторлар туындылары мен халық күй­лерін, Қаршыға Ахме­дия­ров, Мағауия Хамзин, Мұ­рат Өскенбаев, Секен Тұрыс­бе­ков­тердің шығар­маларын орындады.

Сөйтіп «Бас жүлде» иегері анықталды. Ол – Жаяу Мұса атын­дағы Баянауыл балалар өнер мектебінің оқушысы Данагүл Баркен. 

Былтыр Ақтауда өткен «Кас­пий жұлдызы» атты респуб­ликалық байқауда «Ақжарма»  күйін орындаған Данагүл бірінші орынды иеленген еді. Бұдан кейін, қазылар алқасының төр­ағасы, өнер зерттеушісі Мұ­рат Әбуғазы «Кіші топта» үздік атанған Жамбыл облысы, Жамбыл ауданы Мұқан Төлебаев атындағы балалар музыка мектебінің оқушысы Бақ­дәулет Жанатбекке, «Орта топта» оза шапқан Астанадағы №1 балалар музыка мектебінің оқушысы Амалбек Омарбековке, «Жоғары топта» жарқылдаған Ақмола облысы, Есіл ауданы балалар музыка мектебінің оқушысы Диас Орынбасарға бірінші орын жүлдесін тапсырды.

Жүлдегерлер өнер зерт­теушісі Мұрат Әбуғазы сияқты «Құр­манғазы, Тәттімбет және Арқа күйлері», «Әшім және Іле ай­мағының күйлері», «Сарыарқа әндері», «Шығыстың шыңырау күйлері» оқу-әдістемелік кітап­тарын жазған күйші ағаларының қолынан марапат алып, тағы да бір қуанды.
Ал II орынды иеленген Жаяу Мұса атындағы Баянауыл балалар өнер мектебінің оқушысы Айбар Пәзіл мен Шығыс Қазақ­стан облысы, Қарауыл ауданы Жәнібек Кәрменов атындағы саз мектебінің оқушысы Жігер Арқашты («Кіші топта»), тағы бір қарауылдық талант Төлеу­тай Дүйсенов пен Алматы қала­сы білім басқармасы өнер мек­тебінің оқушысы Ақнұр Түкті­баеваны («Орта топта»), Астана қаласының № 1 балалар музыка мектебі оқушысы Дина Көдебай мен Екібастұз қаласы М.Глинка атындағы балалар музыка мектебінің оқушысы Ар­ман Серіковті («Жоғары топ­та») күйші, халықаралық, рес­публикалық күйшілер бай­қауының лауреаты Рүстем Нүр­кенов марапаттады. 

Сонымен бірге Жаяу Мұса атындағы Баянауыл балалар өнер мектебінің оқушысы Аллажар Жаңбырбай, Алматы қалалық білім басқармасы өнер мектебінің оқушысы Мансұр Нұрғожаев «Кіші топта», Семей қаласы №1 балалар музыка мектебінің шә­кірті Нұржан Нұрлан, Жамбыл облысы, Жамбыл ауданы Мұқан Төлебаев атындағы балалар музыка мектебінің өкілі Нұрзат Рахманберді «Орта топта», Жамбыл облысы, Жамбыл ауданы Мұқан Төлебаев атындағы балалар музыка мектебінің оқу­шысы Әлімқұл Сұлтан, Май­қайың балалар өнер мектебінің оқушысы Нұржан Ғабдұлқалиев «Жоғары топта» үшінші орын алып, жүлдегерлер атанды. Лау­реаттарды халықаралық, респуб­ликалық күйшілер байқауының бас жүлде иегері Айтолқын Тоқ­таған марапаттады. 

Марапаттау рәсімі гала-кон­цертке ұласып, байқау қа­тысу­шылары атынан Батыс Қазақ­стан облысы Жаңақала аудандық Қали Жантілеуов атындағы балалар саз мектебінің күйшілері халық күйі «Ортекені» баянауылдықтарға тарту етті. Қазылар алқасының төрағасы Мұрат Әбуғазы орындаған күйлер де күмбірлеп көпшіліктің есінде қалды.

– Екі күн бойы Баянауылды күйге бөлеген байқау кеше мен бүгіннің мәңгілік үндескен рухани жаңғыруы іспетті. Күй құдірет деген осы! – дейді әріптесіміз Еламан Қабдыләшім. Өйткені бұл құдіретті ертеңге жалғастыратын осы жастар!

Жас күйшілер әсем Баян­ауылдан «Келесі, кездескенше!» деп аттанды.

Фарида БЫҚАЙ,
«Егемен Қазақстан»

Павлодар облысы,
Баянауыл ауданы