Астанада халықаралық сәулетшілер конгресі өтіп жатыр

Конгреске алыс және жақын шетел сәулетшілері, Үкімет пен бизнес өкілдері, еліміздің барлық облыстары мен Астана, Алматы, Шымкент сынды республикалық маңызы бар қалалардан сәу­летшілер, девелоперлер, техно­логиялық компаниялар, жобалау бюролары өкілдері, инженер-жобалаушылар, жоғары оқу орындарының сәулет өнері фа­культетінің студенттері, урбанис­тер, қазіргі заманғы суретшілер қатысуда.

Конгрестің салтанатты ашылуында «Астана Innovations» АҚ басқарма төрағасы Олжас Сар­таев өзі басқарып отырған компанияның Елбасы тапсырмасы аясындағы жұмыстарды атқаруда алдыңғы қатарда келе жатқанын айта келіп: «2018 жыл­дың қаңтарында Мемлекет бас­шысы Нұрсұлтан Назарбаев халыққа арнаған кезекті Жолдауында Астана үлгісінде Smart city эталонын қалып­тастыру міндетін қойды. Өз мер­зімінде қойылған міндет жаңа тех­нологиялардың жылдам енуіне әсер етті. Дамып жатқан ел үшін бұл бүгінде ең басты тренд болып отыр. «Астана In­novations» компания­сы осы тап­сырма төңірегіндегі жұмыстарды атқаруда жетекші орынға шықты. Инновацияны тұр­ғын үй шаруашылығы мен қауіп­сіз­діктен бастап әлеуметтік блок­қа дейінгі әртүрлі салаларда енгі­зуде үлкен тәжірибеміз бар. Ал бүгін «ақылды қала» жүйесін құру туралы сөз қозғап отырмыз», – деді.

Сонымен бірге халықаралық деңгейде өтіп жатқан конгрестің мақсаты – кәсіби тәжірибе алмасу, әлемдік сәулет өнері дамуының концептуалдық-теориялық ба­ғыт­тарымен және оның негізгі тен­денцияларымен танысу, қазақ­стандық және шетелдік жетекші сәулетшілермен шығарма­шы­лық байланыстар орнату, қоғам­дағы сананың ашықтығын қалып­тас­тыру, сәулет өнеріндегі ұлттық мә­дениеттің үздік дәстүрлерін сақ­тай отырып, прогрессивті әлем­дік тәжірибе мен білімді қа­был­дау қабілеттілігін  қалып­тас­тыру арқылы заманауи отандық сәулет өнерін дамыту екендігін жеткізді.

Конгресс аясында «Қалалық орта: дәстүрі мен келешегі» тақы­рыбында халықаралық ғылыми-практикалық конференция өтуде. Конференцияда пленарлық отырыс және «Жаңа қалалар. Жаңа кел­бет», «Әлеуметтік жобалау. Ауылдан бастап қалаға дейін» атты 2 панельдік сессия өткі­зу қарастырылған. Сондай-ақ конгресс жұмысы  шеңберінде «Құндылықтарды синтездеу. Жаһ­андық контекстегі локалдық сәй­кестік» тақырыбында «дөңге­лек үстел» мәжілісі ұйымдас­ты­рылды. Мұнда жас талап сәулет­ші­лерді шабыттандыру да ұмыт қалмаған. Жас сәулетшілер, сонымен бірге студенттер стартап уи­­кенд форматында өткізілетін «Қа­­лалық  орта: «Ақылды» аудан» байқауына қатысты. Кон­гресс аясында шеберлік сабақ­тары, шетелдік танымал сәулет­ші­лер­дің дәрістері, «Ортаны қа­­лып­­­­­тас­тыратын кім?» тақы­ры­бын­­да диалог алаңы да ұйымдас­ты­рылды.

Халықаралық сәулетшілер кон­гресін Астанада өткізудің де өзін­дік мәні бар. Бүгінде елор­даның әлеуеті, оның саяси, әлеу­меттік-мәдени өмірінің қарқы­ны, бейбітшілік және келісім ор­та­лығы мәртебесі Астанаға тұр­ғындардың әртүрлі топтары мен әлем елдерінің кәсіби және саяси қауым өкілдерінің назарын аудар­туда. Заманауи дүниежүзілік сәу­лет өнерінің әлемдік тренд­тері, оның архитектуралық кел­беті Елорданың айшықты ерекше­лігі болып табылады, бұл өз кезе­гінде серпінді дамып жатқан қаланың қайталанбас атмосфера­сын құрайды. Әлбетте, бұл әлемге әйгілі сәулетшілер мен сәулет өнерінің отандық май­тал­мандарының шығармашылы­ғын­дағы үндестік нәтижесі.

«Астанада тұрақты даму прин­циптерін енгізуге арналған мынандай бағдарламалық құжат­тар жүзеге асырылып жатыр: Астананың 2020 жылға дейінгі бағдарламасы; тұрақты дамудың 17 мақсаты айқындалған БҰҰ бағ­дарламасы, оның алтауы Ас­танаға сәйкес келеді; сондай-ақ ЭСДҰ стандарттары бар. Осы құ­жаттардың бәрі Астананы дамы­ту үшін анықталған 20 қадам­ды бағдарламаны құруда негіз­гі платформа болып отыр», – деді «Астана Innovations» АҚ бас­қарма төрағасы. Сондай-ақ ол инновацияны енгізуде тұрақ­ты даму принциптері, жасыл тех­нология, урбанистика, смарт жос­пар­лау секілді маңызды элемент­терді қолданбай, қажетті табысқа жету мүмкін емес екенін атап өтті.

Конгресс барысында әріп­тес­тік туралы меморандумға қол қойылды. Меморандум әріптес­тіктің ішінде негізінен мемле­кет­тік саясат пен Астананың ин­дустриялық-инновациялық да­муы саласына бағытталған. «Astana Innovations» АҚ пен Ден­саулық сақтау министрлігі, Бі­лім және ғылым министрлігі, Ең­бек және халықты әлеуметтік қор­ғау министрлігі, сонымен қатар, «Технологиялық даму жөніндегі Ұлттық агенттік» АҚ арасында 4 меморандумға қол қойылды.

Қатарынан 4 күнге жоспар­ланған айтулы жиын бүгін өз жұмысын аяқтайды.

Ұларбек НҰРҒАЛЫМҰЛЫ,

«Егемен Қазақстан»