Кукушкин әлемнің 10-ракеткасын жеңді
<p style="text-align:justify">Теннистен Қазақстанның бірінші ракеткасы Михаил Кукушкин Аус­трияның Вена қаласында теннистен өтіп жатқан ATP сериясына енетін Erste Bank Open жарысының екінші айналымында әлемнің 10-ракеткасын жеңіп, келесі кезеңге жолдама алды.</p>
Кукушкин болгариялық Григор Димитровпен кездесіп, 2 сағат 23 минутқа созылған бәсекеде отандасымыз 6:4, 4:6, 6:4 есебімен қарсыласынан басым түсті. Айта кетейік, Димитров бүгінде әлемнің 10-ракеткасы саналады. Сондай-ақ ол Уимблдон додасы мен Аустралияның ашық біріншілігінде жартылай финалға дейін жетіп, АТР турнирлерінде 8 мәрте топ жарған. Кукушкин қазір әлемдік рейтингте 71 орынға жайғасқан. Бұл жеңісінен кейін отандасымыздың рейтингте жоғарылайтыны анық.
Енді Михаил аталған турнирдің екінші айналымында ресейлік Андрей Рублевпен күш сынасады. Бұл жұптың жеңімпазы келесі кездесуін 26 жастағы мажарстандық теннисші Мартон Фучовичке қарсы өткізеді. Турнирдің жүлде қоры 2 миллион 198 мың 250 еуроны құрайды.
Дайындаған Әли БИТӨРЕ,
«Егемен Қазақстан»