Жүргізушісіз, қағаз-қаламсыз өткен жиын
<p style="text-align: justify;">Ешқандай жүргізушісіз, мінберсіз, микрофонсыз, қағаз-қаламсыз, үстел­сіз, орындықсыз... Өске­мен қаласының әкімі Жақ­сылық Омар биылғы ха­лық­қа есеп беру кездесуін цифр­лы технологиялардың көмегімен жаңа форматта өткізуді бастап кетті.</p>
Қалада 2018 жылы атқарылған жұмыстар, 2019 жылы қолға алынатын шаруалар үлкен экраннан слайд арқылы көрсетіліп, шаһар басшысы тұрғындардың да, өзінің де уақытын үнемдеп, кездесу екі сағатқа жетпей аяқталды.
Негізінен мемлекеттік тілде өткен, екі сағат бойы тізе бүкпей, тік тұрып халыққа есеп берген еркін форматтағы жиында тұрғындар да өздерін толғандырған сауалдарды емін-еркін қоюға мүмкіндік алды. Есепті кездесу халық саны жылдан-жылға көбейіп келе жатқан Жібек маталар шағын ауданында өткендіктен сұрақтардың көбі осы шағын ауданға (Автобустардың жеткіліксіздігі, жаңадан салынған тұрғын үйлердің сапасыздығы, көшелердің тарлығы, жарық пен жылу) қатысты болды.
Кездесуде Өскеменнің өзекті мәселелері де назардан тыс қалған жоқ. Соның бірі – мұғалімдер мен дәрігерлердің жетіспеушілігі. Қала әкімінің айтуынша, Өскеменнің білім саласына – 69, денсаулық саласына 64 маман қажет. «Әсіресе шаһар мектептеріне ер мұғалімдер жетіспейді. Бұл мәселені шешу үшін қала әкімдігі қызметтік пәтер бөлуге әзір. Өскемен мектептері үшін өзекті мәселені былтырғы Тамыз кеңесінде де айтқанмын. Бірақ әзірге бірде-бір ұсыныс түспеді», дейді Ж.Омар.
Азамат ҚАСЫМ,
«Egemen Qazaqstan»
ӨСКЕМЕН