Қазақстан теннисшілері бірінші орын алды
<p style="text-align:justify">Астанадағы Ұлттық теннис орталығында өтіп жатқан Федерация кубогының Азия мен Мұхит жағалауы аймағы бойынша іріктеу жарысының «А» тобындағы бәсекелер Қазақстан құрамасының жеңісімен аяқталды.</p>
Бірінші ойында Таиландты ойсарата ұтқан жерлестеріміз келесі кездесуін Үндістанға қарсы өткізеді. Бұл бәсекеде біздің қыздардың пайдасына шешілді. Атап айтсақ, Зарина Диас Карман Каур Тханди 6:3, 6:2 есебімен ұтса, Юлия Путинцева Анкита Райннан айласын асырды – 6:1, 7:6.
Әрине, Қазақстан құрамасының бұл жеңісіне таңдануға болмас. Өйткені, қос теннисшіміз де әлемдік рейтингте өз қарсыластарынан әлдеқайда жоғары тұр. Мәселен, Юлия Путинцева WTA тізімінде 43-орынды иеленсе, Анкита Райннан 165-сатыға табан тіреді. Ал Зарина Диас 96-орынды еншілесе, Тханди Карман Каур 211-сатыға жайғасты.
Ертең Қазақстан құрамасы «В» тобының жеңімпазы Қытаймен күш сынасады.
Ғалым СҮЛЕЙМЕН,
«Egemen Qazaqstan»