«Цеснабанкке» капитал салды
<p style="text-align: justify;">First Heartland Securites (FHS) брокерлік компаниясы «Цеснабанктің» капиталын 70 миллиард теңгемен толықтырды. Бұл туралы LS хабарлады.</p>
Банктің 99,5 пайыз жай акцияларына иелік ететін компания бұл шешімді «Цеснабанктің» акцияларын сатып алу келісімшартының аясында жүзеге асырып отыр.
«Цеснабанктің» қаржылық тұрақтылығын көтеру мақсатында соңғы бірнеше ай ішінде оған мемлекеттік қолдау шарасы көрсетілгені белгілі. Сөйтіп, проблемалық несиелер қоры оның жалпы құны 604 миллиард теңгені құрайтын ауылшаруашылық несиелер портфелін алған болатын. Оның мән-жайы туралы банк:
– Нарықтағы ахуалдардың жылдам өзгеруіне байланысты ауылшаруашылық тауарын өндірушілердің қаржылық жағдайлары нашарлады. Бұл банктің қаржылық тұрақтылығына әсер етті. Атқарылған жұмыстар нәтижесінде банк капиталына жаңа инвестор тартуға, ауылшаруашылық тауарын өндірушілерге қосымша қолдау көрсетуге және олардың жағдайын жақсартуға қол жеткізілді, – деп хабарлаған болатын.
Сонымен қатар таяуда «Цеснабанк» АҚ басқарма төрағасы Ульф Вокурка қызметінен кетіп, оның орнына Бекжан Пірметов тағайындалды. Бекжан Пірметов бұған дейін «First Heartland Securites» АҚ Басқарма төрағасының орынбасары қызметін атқарып келген болатын.
Назарбаев Университеттің президенті, Назарбаев зияткерлік мектептері Қамқорлық кеңесінің төрағасы және Назарбаев Қорының Қамқоршылық кеңесінің мүшесі Шигео Катсу «Цеснабанк» АҚ Директорлар кеңесінің басшылығына барғанын да айта кету керек.