Атырауда көрісу мейрамы басталады
<p style="text-align:justify">Еліміздің батыс өңірінде наурыз мерекесі ерте басталады. 14 наурызда «Бір жасыңмен!» деп көрісетін ғұрып бар. Мемлекет басшысының «Болашаққа бағдар: рухани жаңғыру» бағдарламалық мақаласы аясында Атырауда өткен жылы амал мейрамы ерекше аталып өтті. Олай деуімізге себеп, «Жаңа жасыңмен, ұлы далам!» тақырыбында ұйымдастырылған халықаралық форум. «Көрісу Fest» халықаралық фестивалі аясында өткен шаралар легі биыл да жалғасын табады.</p>
Өңірлік коммуникациялар қызметі хабарлағандай, 12 наурыз күні сағат 10-да облыстық халық шығармашылығы орталығында «Ойдағы ел қырдағы елмен амандасып...» атты халықаралық айтыс басталады. Сөз аламанына Асанәлі Әшімов бастаған өнер қайраткерлері қазылық етеді. Айтыс екі күнге созылады.
13 наурыз күні 15.00-де бата беруден республикалық байқау өтеді. Ұлттық құндылықтарды насихаттап, бабалар дәстүрінің қадір-қасиетін арттыруды мақсат еткен байқауға еліміздің түкпір-түкпірінен 17 батагөй қатысады деп жоспарланып отыр.
Ал 14 наурыз күні сағат 11-де облыс орталығындағы Сұлтан Бейбарыс алаңында . «Көрісу Fest» халықаралық фестивалі шымылдығын ашады. Шара аясында суретшілер плэнері, облыстық музей көрмесі, ұлттық сусындар мен тағамдар жәрмеңкесі өтеді. «Жастар жарыса көрісіп қауышады» байқауы мен театрландырылған әдеби-музыкалық қойылым мерекенің мәнін келтірмек.
Бақытгүл БАБАШ,
«Egemen Qazaqstan»
АТЫРАУ