Заманауи жатақханалар көбейіп келеді

Осындай қажеттіліктерді назарға алған қала басшылығы таяу жылдарда қарқынды түрде жа­тақхана салуды жоспарлап отыр.  Оның бірқатары қолда­ныс­қа беріліп, қазіргі кезде заманауи талаптарға сай жатақханалар бі­лімге құштар студенттердің жай­лы әрі қолайлы мекеніне ай­налған. 

«Алматы студенттер альянсы» КҚ атқарушы директоры Жас­ұлан Қуандықтың айтуынша, қаладағы 39 жоғары оқу орнында 140 мыңнан астам сту­дент  бі­лім алуда. Қалада оқи­тын әрбір сту­денттің арманы жа­тақханаға қол жеткізу. Осы мақ­сатта «Қазақ­стан студент­терінің альянсы» рес­пуб­лика­лық студенттер қозғалысы «Қа­лай тұрып жатырсың, студент?», «Қалың қалай, студент?» ак­ция­ларын жүйелі түрде өткізіп тұ­рады. «Қалай тұрып жатырсың, сту­дент?» акциясы Алматы қала­сы әкімдігімен бірлесе өткі­зі­ліп, жатақханаларға қатыс­ты сараптама жасалған. «Оқу жылы басталар алдында студент­тер­дің жатақханаларды қабыл­дау дайын­дығын тексерсек, қыс мез­гілінде жылы болуын қада­ға­лаймыз. Сонымен қатар әр­түрлі жағдайлардың алдын алу мақсатында кезектен тыс тек­серістер жүргіземіз. Сараптама нәтижелері Алматы қаласы әкім­дігіне тапсырылып, тиісті шаралар қолданылады. Бүгінде жоғары оқу орындарының ба­за­сында орналасқан 95 жатақ­ханада 31 мың студент тұрақ­таса, әлеуметтік сауалнамалар негізінде қосымша 27 мың сту­денттің жатақханаға мұқтаж екен­дігі анықталды. Былтыр 1 мың орынға арналған 2 жатақхана пай­далануға бері­ліп, 200 орын­ға арналған бір жа­тақ­хана то­лық жөндеуден өтті», дейді Ж.Қуан­дық. 

С.Асфендияров атындағы Қазақ медициналық универ­си­­­те­­тінде 512 орынды «Сту­дент­­тер үйінің» қол­да­ныс­қа берілуі көптен күткен қуа­нышты жағ­дай. Әрине, меди­ци­на­ның болашақ мамандарын жатақ­ха­намен қамтамасыз ету оңай шаруа болған жоқ. Осыдан 20-30 жыл бұрынғымен салыс­тыр­ғанда студенттердің де саны айтарлықтай көбейген. Универ­си­теттің тәрбие жұмысы бойын­ша департамент директоры Нұржан Жолдасбайдың айтуынша, еліміздегі студент­тер санының 500 мыңға жеткенін назарға алатын болсақ, олар­дың 41 пайызын қала сырты­нан қатынап оқитын студент­тер құрайды. Сырттан келіп бі­­лім алатын 5 мыңнан астам студенттің тең жарты­сы­на жуығы жатақханаға мұқтаж. «Студенттер үйі» – медици­на­лық университтегі сегізінші жатақхана. Тоғыз қабатты екі ғимарат бастапқыда шағын отба­сылық жатақхана болып жоспарланған. Барлық талап­тар­ға сай жасақталған студент­тер үйінде компьютер залы, кітап­хана, арнайы асхана,  оқу залы, кітап сақтау орны бар. Студенттердің интернет пайда­ла­нуға, медициналық көмек алуға да мүмкіншіліктері бар. Жатақханаға бірінші кезекте университеттің белсенді жастары мен көмекке мұқтаж студенттер орналастырылған. 

Қазақстан инженерлік-тех­но­­логиялық университетінің депар­тамент директоры Роза Кәріб­жанованың айтуынша, студент­терді жатақханамен қамта­­масыз ету мәселесінің өзек­­тілігін ескере отырып, атал­ған университет республикада бірінші болып жатақхана құры­лысын пайдалануға берді. Университет басшылығы рес­пуб­­ликаның әр өңірінен келген, әсіресе ауыл жастарының сапа­лы кәсіби білім алуларына жағдай жасауда.  Әлеуметтік тұрғыда аз қамтылған, толық емес отбасы және жетім балаларды білім үдерісіне тартуда бірқатар іс-шаралар жүзеге асып келеді.   

Бүгінгі таңда жатақхана құ­ры­­­лысы толық аяқталған әрі заманауи талаптарға сай жаб­­дық­талған.  Студенттердің жан-жақ­ты білім алула­ры үшін компьютерлер, жаңа қондырғылармен қамта­ма­сыз етіліп, техникалық және ақпараттық бағытта түр­лі оқу бағдарламаларын пайда­ла­нуға толық мүмкіндік қарас­ты­рыл­ған.

Эльвира СЕРІКҚЫЗЫ,

«Еqemen Qazaqstan»

АЛМАТЫ