Көнені жаңғыртқан «Көзайым»
<p style="text-align: justify;">Түркістандағы Қ.А.Ясауи атын­дағы ХҚТУ студент­тері оқу орны жанынан түрлі клубтар ашып, қоғам өмірінде белсенділік танытуда. Жуырда жас журна­листер клубы құрыл­ғанын хабарлаған болатынбыз. Ал университет жанынан құрылған «Көзайым» қыздар клубы бүгінде қатарын толық­тырып, жас­тармен жұмыс ауқымын кеңейте түскен.</p>
Жас журналистердің хабарлауынша, «Көзайымға» мүше әрбір бойжеткен күнделікті ұлттық әшекейлер – сырға, шолпы, алқа тағынып, тек ұзын белдемше немесе көйлек киіп жүруі тиіс. Осылайша қыздар бүгінде ұмытыла бастаған шолпының сыңғырын, қазақтың әшекейлерін қайта жаңғыртпақ. Бойжеткендердің бойына ұлттық салт-дәстүрді сіңіруді мақсат еткен клуб алғашқыда өзін өзі дамыту мектебі болып құрылған. Құрамына 600-ден астам қыздар енген клуб мүшелері сабақтан тыс уақытта түрлі бағыттағы арнайы топтарға қатысу арқылы тұрмысқа қажетті нәрселерді үйренуде. Дәмді тағам пісіріп үйренгісі келетіндер «Тәп-тәттім» тобына, қан қысымын өлшеуден бастап, бала күтімі, қыздар гигиенасы мен денсаулыққа қатысты сабақ алғысы келетіндер «Маржан» тобына, араб тілін үйренемін деушілер «Ясауи жастары» ұйымына тіркелген. Сондай-ақ «Шебер», «Қаракөз», «Сұлушаш» тобынан да қыздардың үйренері көп. Көркем мінезді, рухани бай болу керек деп есептейтін қыздар өзін өзі жетілдіру мақсатында аптасына бір кітап оқып шығуды міндет етіп қойған. Жас журналистердің хабарлауынша, М.Жұмабаевтың «Шолпанның күнәсін» оқып шыққан алпыс қыз бас қосып, кейіпкерлердің мінезіне психологиялық талдаулар жасапты.
Қыздар клубының жұмысына облыстық жастар ресурстық орталығы арнайы фотосессия түсірілімін, кездесулер ұйымдастырып, қолдау көрсетуде. Әлеуметтік желілерде ашқан парақшаларына тапсырмаларды жүктеп, таратып, насихаттап отыратын «Көзайым» клубының сабақтарына кез келген ару қатыса алады.
Ғалымжан ЕЛШІБАЙ,
«Egemen Qazaqstan»
Түркістан облысы