Елордада бас мешіттің құрылысы басталды

Жаңа мешіт ЭКСПО қалашығының аумағында тұрғызылуда. Онда бір мезетте 30 мың адамның құлшылық етуіне мүмкіндік болады. Оның ішін­де әйелдерге арналған 3000 орын бар. Ғимараттың жалпы көлемі 57 мың шаршы метрді құрайды, ал мұна­расының биіктігі 130 метрге жет­кі­зілмек. Сондай-ақ күмбезінің диаметрі – 63 метр.

Елбасы осынау ұлық істің Нау­рыз айының қарсаңында басталуын жақ­сылыққа жоритынын айтты. Мем­лекеттік бюджеттен мешіт құры­лысына қаржы бөлінбейді. 

– Бұл ел тәуелсіздігінің қарсаңында өткен үлкен мәжілістердің бірінде жоспарланған жұмыс еді. Мешіт салу үшін арнайы қор құрылып, еліміздің белгілі кәсіпкерлері мен қарапайым аза­маттары қаржылай үлес қосуда. Қа­зақстанның тәуелсіздік жылдарында елдің саясатының арқасында өсіп-өніп, бизнесін өркендеткен азамат­тар­дың бір тобы құрылыстың басталу рә­сіміне де қатысып отыр, – деді Ел­басы. 

Мемлекет басшысы, сонымен қатар жаңа мешіт діни ғимарат болып саналғанымен, Астананың ең бір кө­рік­ті әрі туристерді баурап тұратын ғи­ма­рат тарының бірі болатынын жет­кізді. 

– Мен таяуда БАӘ-де болып, ал­тыннан тұрғызылған шейх Заид мешітін көрдім. Бұл мешіт 3-4 жыл бұрын ғана ашылса да, оған жыл сайын 6 миллион турист барады. Алла ісімізге береке берсін. Ұрпақ­тары­мыздың болашағы жарқын болсын, – деді Мемлекет басшысы. 

Жоспар бойынша мешіт құры­лысы екі жыл ішінде аяқталуы тиіс. Ал құрылыстың уақытылы және сапалы жүргізілуі Мемлекет басшысының тікелей бақылауында болады. Прези­денттің айтуынша, мешіт жобасын бекітер кезде әлемдегі үздік мешіт­тер­дің артықшылықтары елеп-екшеліп, ең үздігіне таңдау жасалған. 

Қала әкімдігінің жоспары бойынша елорданың Бас мешітінің қапталынан көлемі Ботаникалық бақтан да үлкен саябақ орын тебеді. 

Мешіт құрылысына тапсырыс беруші «Астана-2020» қорының ат­қарушы директоры Нұржан Мың­жа­саровтың айтуына қарағанда, құл­шылық үйіне әлемдегі ең заманауи материалдар пайдаланылмақ. 

Мешіттің аумағында 3500 көлік­ке арналған жабық және ашық авто­тұрақтар қарастырылған. 

– Бұл мешіт Орталық Азия мен ТМД мемлекеттерінің ішіндегі ең алып және бірегей мешіт болуы тиіс, – деді журналистерге сұхбат берген Н.Мыңжасаров. 

Енді 24 айдан соң Астанаға әуе­жайдан келер тұста ең бір сәулетті ме­шіт жамағатқа есігін айқара ашады. 

Құрылысқа жауапты компания өкілдері жұмыстың ең қызған тұсында бір мезетте шамамен 2,5 мыңдай құ­ры­лысшы тартылатындығын айтып отыр. 

Жауапты жұмыстың маңыз­ды­лығы мен жауапкершілігі қазірдің өзін­де қажетті құрылыс көліктерінің тізі­ліп қойылғанынан да аңға­рыл­ды. 

Сондай-ақ, Мемлекет басшысы Қа­зақстан мұсылмандары діни басқар­ма­сына барды.

Нұрсұлтан Назарбаев елорданың Алматы ауданындағы Қазақстан мұ­сыл­мандары діни басқармасының жаңа ғимаратын аралап көрді.
Мемлекет басшысы Қазақстан мұ­сылмандары діни басқармасының қа­зіргі жұмысымен және алдағы жос­парымен танысты, сондай-ақ қызмет­керлермен әңгімелесті.

– Сіздердің жұмыстарыңыз үшін барлық жағдай жасалды. Біз сіздермен бірге халықтың игілігі үшін еңбек ете­міз. Егер мемлекетте бірлік пен келісім болмаса, ондай елдің болашағы жоқ, – деді Қазақстан Президенті.

Нұрсұлтан Назарбаев жиынға ­қаты­сушыларды келе жатқан Наурыз мейрамымен құттықтап, Діни басқар­маның жұмысына табыс тіледі.

* * *

«Нұрлы Астана» корпоративтік қоры Қазақстан мұсылмандары діни бас­қармасы жаңа ғимаратының құры­лы­сын 2015 жылдың қазан айында бастап, 2018 жылғы желтоқсанда аяқ­тады.

Серік ӘБДІБЕК,

«Egemen Qazaqstan»