Қайсар қартқа құрмет

Мына бір фотоны көрген жан еріксіз ойланары хақ. Көрік кеудесі орденге толы, еңсесі елден биік, жүзінде арайлы шуақ, бойында қажырлы қуат... бірақ адымдап басатын, асудан іркілмей асатын екі аяғы белуардан жоқ соғыс ардагері жылжымалы тақтайша үстінде қос қолымен жер сызып, қайқая шапқан қарагердей ілгері тартып келеді. Қарияның қайратына тамсанған төрт теңізші-сарбаз қолдарын самайларына көтеріп, тік тұрып құрмет көрсетуде.

Фотодағы ардагердің аты – Анатолий Леопольдович Голимбиевский. 1921 жылы 15 шілде күні Петерборда туып, 2001 жылы дүниеден өткен. Екінші дүниежүзілік соғыстың ардагері. Ресейлік ақпарат көздерінен алынған дерекке үңілсек, Анатолий ақсақал 1943 жылы ақпан айында Новороссийск қаласының маңындағы «Кіші Жер» үшін болған шайқасқа қатысып, «Сообразительный» эсминцасында қызмет еткен. Қысқасы, Цемесскі бұғазындағы қырғында екі аяқтан айырылса да, аман қалған аз жауынгердің бірі.

Ал мына өздеріңіз көріп отырған фотобейне 1989 жылы 9 мамыр күні Ленинградтың кеме тоқтайтын теңіз айлағында түсіріліпті. Суретті түсірген Ленинград мемлекеттік университетінің түлегі, фотожурналист, сол тұста «Ленинградская правда» газетінің қызметкері Иван Куртов. Ардагерге құрмет көрсетіп тұрған төрт жігіт Адмирал Нахимов атындағы пароходтың жауынгерлері.

Сурет әуелі «Ленинское знамя», «Смена», «Ленинградская правда» басылымдарында жарияланып, соңынан ИТАР-ТАСС арқылы «Әскери-теңіз флотының ардагері Анатолий Голимбиевскийге сәлем» деген атпен дүние жүзіне тараған. Фотобейне 1990 жылы World Press Photo атты халықаралық беделі зор көрмеде бірінші орынға ие болып, авторы «Золотой глаз» («Алтын көз») сыйлығын жеңіп алыпты.