Жекпе-жек күні белгілі болды
Кәсіпқой бокстың орта салмақ дәрежесінде жұдырықтасатын қазақстандық боксшы Жәнібек Әлімханұлы 17 тамызда шаршы алаңға көтеріледі. Бұл туралы боксшы өзінің әлеуметтік желідегі парақшасында хабарлады.
26 жастағы отандасымыз АҚШ-тың Лос-Анджелес қаласындағы Banc of California Stadium аренасында өтетін бокс кешінде жұдырықтасады. Жекпе-жек 10 раундқа жоспарланған. Ал қарсыласы осы аптаның ішінде белгілі болмақ. Кештің басты жекпе-жегінде екінші жеңіл салмақтағы WBO чемпионы мексикалық Эммануэль Наваррете (27-1, 23 КО) мен америкалық Франсиско Де Вака (20-0, 6 КО) жұдырықтасады.
Айта кетейік, Жәнібек Әлімханұлы (4-0, 1 КО) соңғы жекпе-жегінде АҚШ боксшы Кристиан Оливаспен (16-4, 13 КО) жұдырықтасып, WBO Global және WBC Continental Americas белбеулерін иеленген-ді.