Үй гүлдерін өсірушілер клубы
<p style="text-align: justify;">Облыстық кітапханадағы әуесқой гүл өсірушілер клубының мүшелері Елена Асеева, Раиса Попова, Людмила Зорина, Елена Просянниковалар үй гүлдерін өсіру, күту, бөлме өсімдіктерін жасарту және қайта отырғызу жайлы кеңестер береді.</p>
Үй гүлдерін өсірушілер 15 жылдан астам уақыттан бері осы кітапханада жиналады. Отырыстардың барысында алдымен гүлдер әлемінің жаңалықтары талқыланады. Қатысушылар гүл сұрыптарымен алмасады, гүл өсіру, ландшафтық дизайн бойынша жаңа кітаптармен танысып, бөлме өсімдіктерінің жаңа сұрыптарын көреді.
Гүл өсіруші Елена Асеева ауырып қалған гүлдерді қалпына келтіру, гүлдер мен өсінділерді қайта отырғызу, сапалы топырақ таңдау, дұрыс жарықтандыру және қалыпты суару сияқты шеберлік сыныбын және тәжірибелік сабақтар өткізеді.
Биолог мамандардың айтуынша, үй гүлдерімен жиі «сөйлесіп» жүрсе, гүлдер бізді тыңдайды, ән әуендері де ерекше әсер береді.
– Әдемі гүлдейтін шегіргүлдер, эписциялар, жаңа гвинеялық бальзаминдер, «Жаңбыр әуені», «Эстель», «Рапсодия-Кора», фуксиялар, сәндік-жапырақты гүлдер өсірген жақсы. Қазір шеттен жеткізілетін үйде өсірілетін гүлдердің түр-түрі бар. Әр гүлдің күтімі әртүрлі. Бірі күн көзін жақсы көрсе, енді бірі, мысалы, драцена тек көлеңкеде өседі, – дейді «Фиалочка» әуесқой гүл өсірушілер клубының жетекшісі Елена Асеева.
Ал «Фиалочканың» кезекті отырысына келген әйелдерді жазғы уақытта үй гүлдерін қалай суару, қалай куту керектігі мазалайды.
– Жаз кезінде үй гүлдерін ыстықтан сақтау үшін салқын жерге қойған дұрыс. Бөлмені мүмкіндігінше салқындату қажет. Гүлдерді салқын сумен бүркіп, өсімдіктердің тамыр жүйесі зардап шекпеу үшін аз-аздан суару керек, – деді Елена Асеева.
Гүл өсірушілерге «Ян менуэт», «Қар эдельвейсі», «Пираттар қазынасы», «Тропикана», «Әкесінің қызы Даша» атты жаңа фиалка сорттарын өсіруді ұсынды.
ПАВЛОДАР