Вирустық менингит толықтай жазылады - инфекционист
<p style="text-align: justify;">Елордалық балабақшаның бірінде балалардың вирустық менингит жұқтырған екі жағдайы тіркелді. Осы себептен дәрігерлер өз бетімен ем жасамай, алдын алу шараларын қатаң ұстануға кеңес береді. Қазақстан Республикасының штаттан тыс бас инфекционист-дәрігері, медицина ғылымдарының докторы, профессор, Астана Медициналық университетінің балалар инфекциялық аурулары кафедрасының меңгерушісі Данагүл Баешева инфекциялық аурулардың белгілері мен сірлі менингиттің қаншалықты қауіпті екенін айтып берді. Бұл туралы Нұр-Сұлтан қаласы әкімдігінің баспасөз қызметі хабарлады. <br /><br /></p>
Инфекционист-дәрігердің айтуынша, инфекциялық аурулар мерзімге қарай таралады. Мәселен, жаз бен күздің басы энтеровирустық инфекциялардың таралуына қолайлы кезең. Олардың 85%-ы адам бойында ешбір белгі бермейді. Вирус екі жолмен - ауа және тамақ арқылы жұғады.
«Вирустар 50 градустан асқан температурада жойылады, алайда бірнеше рет қатырғанның өзіне де шыдай береді, ал +4+6 градуста және суда ұзақ сақталады. Олар ультракүлгін сәуленің әсерінен, кептіргенде және қайнатқанда жойылады», - дейді Данагүл Баешева.
Дәрігердің айтуынша, вирустық инфекцияларды көбіне 3-10 жас аралығындағы балалар жұқтырады. Вирус ауа арқылы да, тамақ арқылы да жұққандықтан, кейде жедел респираторлық-вирустық инфекция, болмаса өткір жұқпалы ішек аурулары сияқты өтуі мүмкін, тек ұзағырақ қалтырап, қызу көтеріледі. Сондай-ақ, бұл кезде мидың жұмсақ қабығы да қосылып, сірлі менингитке әкелуі мүмкін.
«Энтеровирустық менингит бактериялық түріне қарағанда қатерсіз, одан адам толықтай жазылып кетеді»,- дейді маман.