«Педагог мәртебесі туралы» заң жобасы қаралуда
<p style="text-align: justify;">Мәжіліс Төрағасы Нұрлан Нығматулин Нұр-Сұлтан қаласының ұстаздар қауымымен кездесті. Онда бүгінде Мәжіліс депутаттары жұмысқа алған «Педагог мәртебесі туралы» заң жобасы әңгіме өзегіне айналды, деп хабарлады Мәжілістің баспасөз қызметі.</p>
Елордалық мектепте өткен кездесуге ұстаздар қауымы, аталған заң жобасы бойынша жұмыс тобының мүшелері, құзырлы министрліктің өкілдері қатысты. Мәжіліс Төрағасы өз сөзінде:
– Елбасы Нұрсұлтан Назарбаевтың және Мемлекет басшысы Қасым-Жомарт Тоқаевтың мұғалімдер мен оқушылар жүктемесін қысқарту, өз міндеттемелеріне кірмейтін жұмыстан босату туралы басқа да тапсырмалары бар. Бірнеше айдан бері заң жобасы Мәжілістің барлық комитеттерінде тиянақты әрі жан-жақты қаралуда, – деді.
Мәжіліс Спикері атап өткендей, бүгінге дейін жұмыс тобының 21 отырысы өтіп, 100-ден астам түзетулер қаралған. Дегенмен, заң жобасын бүге-шігесіне дейін тыңғылықты әзірлеу үшін Парламент өкілдері осы кездесуді ұйымдастырып отыр.
Кездесу барысында Мәжіліс Төрағасы ұстаздардың міндеттемелеріне кірмейтін жұмыстарды орындауға мәжбүрлеуден қорғау, негізсіз тексерулерге тыйым салу сынды мәселелерге баса назар аударды.
Сондай-ақ мұғалімдердің атақ-абыройын қорғауға да көңіл бөлінді. Мәжіліс Спикері нормативтік оқу жүктемесіне тоқталып, мұғалімдер жүктемесін қысқартуды қараған кезде, оқушылардың да апталық жүктемесін азайтуды ойлану қажеттілігіне тоқталды.
Өз кезегінде ұстаздар қауымы заң жобасының маңызды нормаларын талқылауға зор қызығушылық танытты.
Кездесу соңында Н. Нығматулин аталған заң жобасының барлық талаптарға сай, сапалы болуы үшін ұстаздар тарапынан айтылған барлық ұсыныс-пікірлер жан-жақты талданып, барынша ескерілетінін атап өтті.
Педагогтар маңыздылығын ескере отырып, ұйымдастырылған кездесу үшін өз ризашылықтарын білдірді.