Қос боксшы жеңісімен қуантты
<p style="text-align: justify;">Өткен сенбі күні кәсіпқой бокста бақ сынап жүрген Данияр Елеусінов пен Айдос Ербосынұлы кезекті рейтинг­тік жекпе-жектерін өткізіп, қар­сы­лас­тарын айқын басымдықпен жеңді.</p>
Жартылай орта салмақта жұдырықтасатын Данияр Елеусінов АҚШ-тың Аризона штатындағы Финикс қаласында өткен кәсіпқой бокс кешінде шаршы алаңға көтеріліп, америкалық боксшы Алан Санчестен техникалық нокаутпен басым түсті. 10 раундқа жоспарланған кездесудің төртінші раундында Санчес сол көзінен жарақат алған соң, дәрігерлер оған жекпе-жекті жалғастыруға рұқсат бермеді. Осылайша отандасымыз кәсіпқой бокстағы тоғызыншы жеңісіне қол жеткізді.
Ал Ресейдің Красноярск қаласында жекпе-жек өткізген екінші орта салмақтағы қандасымыз Айдос Ербосынұлы венесуэлалық Омар Гарсиямен жұдырықтасып, сегізінші раундта техникалық нокаутпен жеңіске жетті. Бұл отандасымыздың кәсіпқой бостағы 13-ші жеңісі. Сондай-ақ Айдостың еншісінде WBO Global, WBC Asia және WBA Inter-Сontinental белдігі бар.