Екінші қоланы қоржынға салды
<p style="text-align: justify;">Қытайдың Шеньчжэнь қаласында өткен Халықаралық су спорты түрлері федерациясының (FINA) санатындағы Champions Swim Series жарысының бірінші кезеңі өз мәресіне жетті. Бай­рақты бәсекеде отандасымыз Дмитрий Баландин екі қола медаль олжалады.</p>
Бірінші кезеңнің соңғы күнінде ол 200 метрге брасс әдісімен жүзуден қола жүлдегер атанды. Ол аталған қашықтықты 2:13:58 уақыт көрсеткішімен жүзіп өтті. Бәсекеде Баландиннен бес секунд ерте жүзіп өткен Нидерланд өкілі Арно Камминга топ жарды (2:09:00). Күміс жүлдені германиялық Марко Кох иеленді.
Айта кетейік, Рио Олимпиадасының чемпионы жарыстың алғашқы күнінде 100 метр қашықтыққа брасс әдісімен жүзуден қола жүлдегер атанған-ды. Былтыр ғана тұсауы кесілген үш кезеңнен тұратын доданың екінші кезеңі 18-19 қаңтарда Бейжіңде өтеді.