Бұрынғыдан ұғынықты жазылған

Бұл отырыста сөз тізгінін қо­ғам қай­раткері, Ұлттық қоғамдық сенім кеңесінің мүшесі Мұрат Әбе­нов ұстады. Ол сөз басында заң жобасы қолданыстағы заң­ға түзету енгізуді ғана көздемей, бейбіт жиналыстардың барлық түрін ұйым­дас­тыруды реттейтін жаңа нормативтік құқық­тық акт екенін атап өтті. Сондай-ақ мо­дератор митинг өткізудің бағыт-бағдары болатын жаңа заң­ның тұжырымдамасына қатыс­ты әрбір азамат ой-пікірін, ұсыныс­тарын 21 ақпанға дейін Ашық үкімет сайты арқылы білдіре алатынын жеткізді.

Бүгінде елімізде «Қазақстан Рес­публикасындағы бейбіт кезде­сулерді ұйымдастыру және өткізу тәртібі туралы» заң жобасы қызу талқыланып жатыр. Бұл тақырып біраз қоғам белсендісінің басын қосқан жиынға да арқау болды. Әрі аталған пікірталас алаңы #TaldaKZ Онлайн сарапшылар платформасы арқылы тікелей эфирде өтті. Бұл талқылауға әлеуметтік желілердің көмегімен көпшілік те араласып, сұрақтарын қойды, пікірлерін білдірді.

Жиынға Ақпарат және қоғам­дық даму министрлігі Азаматтың қоғам істері коми­тетінің төрағасы Әлия Ғалымова қатысып, заң жобасы жөнінде өз ойын ортаға салды.

– Бұл – түбегейлі жаңа заң жобасы. 1995 жылғы заңға қара­ғанда, түсінікті құжат болады деп ойлаймын. Бейбіт жиналыстардың барлық түрі, соның ішінде митингілер, шерулер, демонстрациялар, пикеттер өткізу туралы осы заң жобасында анық және ұғынықты жазыл­ған. Екіншіден, бейбіт жина­лыстар өткізу өтінімдерінің регла­менттеу және хабарландыру тәртібі енгізіледі. Егер қан­дай да бір ұйымды немесе қоғам­ды толғандыратын мәселе бойын­ша бейбіт жиналысты ұйым­дастырушы жергілікті атқарушы органға өтінім берген жағдайда, онда өткізу орнын, мақсатын және күнін айқындайды, қаты­су­шылардың санын нақты белгі­лейді. Сондай-ақ ол жиналыс өткізу үшін қажетті шарттарды анықтайды, – деді Әлия Ғалы­мова.

Ал қоғам қайраткері, Ұлттық қоғамдық сенім кеңесінің мүшесі Ерлан Саиров азаматтардың жаңа заң жөніндегі барлық талап-тілегі ескерілетініне сенім артты.

– Бұл заң қазақстандықтарды бейжай қалдырып отырған жоқ. Адамдар осыған қатысты түрлі пікірлердің аясында топтасып жатыр. Бірақ олардың арасында антагонизм пайда болмауы керек. Бүкіл процестің бейбіт түрде келісіммен жүргізілуі маңыз­ды. Ұлттық кеңестің мүшелері ретінде өз позиция­ларымызды жақындастыруымыз керек. Ме­ніңше, осы заңның әрбір бабын талқылағаннан гөрі, заңға қатысты ой-пікірлері бар азамат­тардың басын қосып, бірлескен комиссия отырысын өткізу керек сияқты, – деді Ерлан Саиров.

Сонымен қатар Еуразиялық интеграция институтының сарапшысы Самат Нұртаза митингіге қатысушылардың санын белгілеуге қатысты өз ойымен бөлісті. Ол бейбіт жиындарға қаты­са­тындар 250 адамнан ас­пау керек деген ойды құпта­ды. Яғни, митинг өткізу мәде­ниеті қалыптасқан са­йын біртін­деп қатысушылардың санын кө­бейтуге болады. Бұған қоса қоғам белсендісі сыртқы күштердің құрбаны болып кетпеуі үшін кіш­кентай балаларды митингіге алып келуге қарсы екенін жеткізді.