Оралда 12 кәсіпкер төтенше жағдай режимін бұзған
<p style="text-align: justify;">Батыс Қазақстан облысында көңіл көтеру орындары мен минимаркет иелері Қазақстан Республикасының төтенше жағдай режимін бұзғаны үшін жауапқа тартылды.</p>
Қазақстан Республикасының аумағында төтенше жағдай енгізілуіне байланысты уәкілетті органдар өкілдерінен құралған комиссия Орал қаласында ойын-сауық ғимараттары мен дүкендерін төтенше жағдай талаптарының сақталуын тексерді.
- Әлемді жайлаған індетке байланысты елімізде төтенше жағдай енгізіліп, салынған тыйымдарға қарамастан, кей азаматтар өз қызметкерлеріне де, басқа халыққа да вирус жұқтыру қаупін төндіріп, жұмысын жалғастырып жатқаны анықталды, - дейді Батыс Қазақстан облыстық сотының баспасөз хатшысы Нұргүл Қанатбаева.
Мәселен тек 24-25 наурыз күндері Орал қаласының мамандандырылған әкімшілік соты Қазақстан Республикасындағы төтенше жағдайды бұзғаны үшін әкімшілік құқық бұзушылық туралы 12 істі қараған.
Сөйтіп, сот шешімімен 2 әйел, 6 ер адам 3 күннен 10 күнге дейін әкімшілік қамауға алынған. Ал қалған 4 тұлға отбасы жағдайы байланысты қамаудан босатылып, 10 айлық есептік көрсеткіші мөлшерінде айыппұл салынды.
Батыс Қазақстан облысының бас мемлекеттік санитарлық дәрігерінің 2020 жылғы 21 наурыздағы № 2 бұйрығына сәйкес ауданы 2000 шаршы метрден кем емес сауда нысандарының жұмысы таңертеңгі сағат 9.00.-ден кешкі 21.00.-ге дейін ғана болуы тиіс. Бұл жөнінде өңірдегі барлық интернет-ресурстарда және бұқаралық ақпарат құралдарында жарияланған.
Батыс Қазақстан