Тасымал қарқыны төмендеді
<p style="text-align: justify;">Ұлттық мұнай тасымалдаушы оператор «ҚазТрансОйл» компаниясы биылғы алғашқы тоқсандағы жұмыс көрсеткіштерін жариялады. Үш айдың қорытындысы бойынша тасымалдау қарқыны бұрнағы жылдармен салыстырғанда азайғаны байқалады.</p>
Компанияның баспасөз қызметінің хабарлауынша, жыл басынан бері магистральды мұнай құбырлары жүйесі арқылы тасымалданған мұнай мен мұнай өнімдерінің, сондай-ақ ауыстырып құйылған өнімнің жалпы көлемі 10 млн 510 мың тоннаны құрады. Бұл былтырғы үш айдың көрсеткішінен 535 мың тоннаға аз.
– «ҚазТрансОйл» АҚ магистральдық мұнай құбырлары арқылы өткен мұнай көлемі 8 млрд 978 млн тонна/км болды. Бұл да 2019 жылдың алғашқы тоқсанымен салыстырғанда 347 млн тонна/км аз. Компанияға қарасты құбыр арқылы жасалған жалпы жүк айналымы 10 млрд 738 млн тонна/км болып, өткен жылмен салыстырғанда 538 млн тонна/км-ге төмендегені анықталды, – деп хабарлады баспасөз қызметі.
Қаңтар-наурыз айларында еліміздегі мұнай өңдеу зауыттарына «ҚазТрансОйл» 4 млн 69 мың тонна мұнай жеткізді. Сөйтіп, көрсеткіш былтырғыдан 76 мың тоннаға ұлғайғаны анықталды. Атап айтқанда, Атырау зауытына 1 млн 405 мың тонна, «ПетроҚазақстанОйлПродактс» ЖШС-на
1 млн 225 мың тонна, Павлодар мұнай-химия зауытына 1 млн 329 мың тонна, «CASPI BITUM» ЖШС-на 110 мың тонна көмірсутегі жеткізілді.
«ҚазТрансОйл» АҚ қуатын пайдаланып Ақтау кемежайында танкерлерге мұнай құю 528 мың тоннаны құрап, былтырғы меже 26 мың тоннаға асыра орындалды. «Қазақстан-Қытай құбыры» ЖШС мұнай құбырлары жүйесі бойынша мұнай тасымалдау көлемі 3 млн 700 мың тоннаға жетті. Атырау мен Маңғыстау облыстарына «Астрахан-Маңғышлақ» су таратқышы арқылы 6 млн 603 мың текше метр су берілгенін айта кету керек. Бұл былтырғы көрсеткіштен 231 мың текше метрге көп.