Үздік жобалар Үкіметке ұсынылады
<p style="text-align: justify;">«Стоп-Коронавирус» онлайн-бай­қауының нәтижелері бойын­ша бірқатар жоба қазылар алқа­сы­ның ең жоғары баға­ла­рына ие болды: ДНҚ гендерінің топтамасын құру, реагенттер жиынтығын алу, вирусты анықтаудың жо­ға­ры сезімтал жүйесін жасау, ауру­дың әртүрлі деңгейіндегі диаг­ностика тәсілдерін пайда­ла­ну, вирусқа қарсы препаратты әзірлеу, биоыдырайтын ма­те­риалдан қолды қорғау құрал­да­рын жасау, қазақстандық диа­­томитті пайдалана отырып рес­пираторлық маскаларды жа­сау және коронавирустың ауыр түр­лерін емдеу барысында биоме­дици­налық жасушалық өнім­ді қолдану.</p>
Қазылар алқасының шешімі бойынша финалға қатысқан барлық 39 жоба тиімділігі жоғары және іске асыруға дайын, сондықтан барлығы Үкіметтің қарауына, сондай-ақ мүдделі инвесторларға ұсынылады.
Қазылар алқасының бағалауымен қатар жобалар бойынша онлайн-дауыс беру жүргізілді. Соның нәтижелері бойынша «халықтық» топ-жобалар анықталды. Қазылар алқасының бағалауы мен онлайн-дауыс беру нәтижелерін және қазылыққа кірген адамдардың тізімін Ғылым қорының t.me/sciencefund Telegram арнасынан көруге болады.
«Стоп-Коронавирус» байқауын «Ғылым қоры» АҚ ұйымдастырды. Байқауға барлығы 140-тан астам өтінім келіп түсті. Коронавируспен күресу жөнінде өз ұсыныстарын ғалымдар, докторанттар, кәсіпкерлер мен стартаперлер ұсынды. «Стоп-Коронавирус» байқауы онлайн-режімде өтті. Авторлар тікелей эфирде өз жобаларын қазылар алқасы мүшелеріне таныстырып, сұрақтарға жауап берді. Негізінде, ақпарат Facebook әлеуметтік желісі арқылы Bilim PLUS парақшасында көрсетілді. Онлайн формат бағалау үрдісінің барынша ашықтығын қамтамасыз етті және барлық қатысушылардан қолдау тапты. Қазылар алқасының құрамына денсаулық сақтау, IT саласының танымал мамандары, кәсіпкерлер мен қоғам қайраткерлері кірді. Қазылар алқасының төрағасы болып белгілі қоғам қайраткері, «Серпін» білім және инновация ұлттық палатасының басшысы Мұрат Әбенов сайланды.
– Мен үшін қазақстандық ғалымдардың көбі осы тақырыпта жұмыс істеп жатқаны күтпеген жағдай болды. Жобалар өте жақсы және білікті авторлардың ұсыныстарында коронавирусты анықтауға арналған тестілерден бастап вакцина, емдік тамақтану, дезинфекция, вирустың алдын алу шараларына дейін қамтылған. Ертең-ақ өндіріске енгізуге тұрарлық тартымды жобалар бар. Біздің ғалымдар өз өнімдерімен нарыққа шыға алады және шығуы керек, – деп атап өтті Мұрат Әбенов.
Байқау қорытындысы бойынша «Ғылым қоры» АҚ мүдделі тараптармен бірлесіп, келіп түскен ұсыныстарды алға тарту және іске асыру бойынша жұмысын жалғастырады.