Түркістан: Баға тұрақтылығы басты назарда
<p style="text-align: justify;">Сыбайлас жемқорлыққа қарсы іс-қимыл агенттігінің Түркістан облысы бойынша Департаменті бастамасымен облыс орталығында орналасқан бірқатар сауда орындарындағы әлеуметтік маңызы бар тауарлардың баға тұрақтылығына монтиорингтік бақылау жұмыстары жүргізілді. </p>
Құрамында Департамент басшысының бірінші орынбасары Мирас Қарғабай, Nur Otan партиясы облыстық филиалының бақылау жөніндегі инспекторы Асқар Еркінбеков пен «Түркістан – адалдық алаңы» жобалық кеңсесінің менеджерлері, қоғам белсенділері, БАҚ өкілдері бар мониторингтік топ қала тұрғындары жиі бас сұғатын «Шапағат», «Дастархан» ірі сауда орталықтарына барып, азық-түлік өнімдерінің баға тұрақтылығына зерделеу жұмыстарын жүргізді.
Ұн, күріш, күнбағыс майы сынды тауарлар бекітілген тұрақты шекті бағамен сатылымға шығарылып жатқанымен бірқатар кемшіліктер де анықталды. Мәселен, халық жиі тұтынатын 9 түрлі азық-түлік тауарларының (ұн, нан, макарон, күріш, сиыр еті, тауық жұмыртқасы, күнбағыс майы, ас тұзы, қарақұмық жармасы) шекті бағасы көрсетілген нұсқаулықтардың көпшіліктің көзі түсетін орындарда орналастырылмағандығы және кіші азық-түлік дүкендерінде шекті бағадан өсіру деректерінің кездескендігі мәлім болды. Бұл орайда жеке кәсіпкерлерге ескерту жасалып, сауда нысанындағы әлеуметтік маңызы бар азық-түліктер бекітілген шектік бағаға келтірілді.
Департамент халыққа қажеттілігі жоғары тауарларды негізсіз өсіруге жол бермеу мақсатында қоғамдық бақылауды тұрақты түрде жүргізіп тұрмақ.
Түркістан облысы