Санитарлық сертификат артық болмайды
<p style="text-align: justify;">Төтенше жағдай режімінің мамыр айына дейін ұзартылғаны, меніңше, дұрыс шешім. Өйткені осының алдында сарапшылар төтенше жағдай 15 мамырға қарай аяқталады деп болжаған еді.</p>
Президент мамырдың 11-інен бастап төтенше жағдай режімі аяқталатынын айтып, арнайы Жарлық шығарды. 1 мамырдан бастап Нұр-Сұлтан мен Алматы қалаларында әуе рейстері ашылатыны мəлім болды. Сөз жоқ, бұл – жақсы хабар. Азаматтардың қатынасына да, әуе қатынасы саласына да осы шешім тиімді болады деп санаймын.
Бұған дейін медицина мамандары адамдар өзара екі метрлік арақашықтықты сақтауы керектігін ескертті. Ұшаққа медициналық бетперде киіп келуі керектігі айтылды. Жолаушылардың температурасы міндетті түрде өлшенеді. Коронавирус инфекциясын жұқтырмағаны туралы арнайы медициналық анықтама да талап етіледі. Бұл талаптар сақталса, індеттің таралуына біршама шектеу қойылады.
Осы ретте барлық тәртіпті сақтау үшін санитарлық сертификат тапсыру мәселесін қолға алған артық болмайды деп санаймын. Өйткені жауапкершілікпен бірге, оны қадағалайтын ереже де болуы тиіс. Мұның барлығын тұтынушылар, қызмет көрсетушілер, тауар сатушылар және кәсіпкерлер нақты сақтайтын болса, қауіпті дерттің таралып кетуіне жол берілмейтіні күмəнсіз.
Абылай МЫРЗАХМЕТОВ,
«Атамекен» ҰКП басқарма төрағасы