Аттестат тапсыру рәсімін өткізу күні белгіленді
<p style="text-align: justify;">Бұл туралы Білім және ғылым министрінің орынбасары Шолпан Каринова хабарлады. Қашықтан оқыту жағдайында мектеп бітірушілері үшін қорытынды аттестаттау емтихандары өткізілмейтінін бұдан бұрын жазғанбыз. Енді жыл сайын маусым айының соңында өтетін аттестат тапсыру рәсімінің де уақыты өзгерді. </p>
«11-сынып түлектеріне аттестат 3-4 маусымда тапсырылады. Жыл сайын бұл іс-шара маусым айының ортасында өткізілетін. Бірақ мектеп бітірушілері үшін қорытынды аттестаттау емтихандары өткізілмейтінін және ҰБТ-ға қашықтан дайындалу қажеттілігін ескере отырып, бұл іс-шараны маусым айының басынды өткізу туралы шешім қабылдадық. Іс-шара аясында салтанатты түрде аттестаттар тапсырылып, 11-сынып түлектері үшін соңғы қоңырау соғылады», деді Ш.Каринова.
Министрлік аталған іс-шараның міндетті түрде мектеп аумағында, ашық ауада, қонақтарсыз, тек түлектердің қатысуымен және санитарлық нормаларды сақтай отырып өтуі тиіс екенін және аттестат тапсыру рәсіміне мектеп формасында келу ұсынылатынын мәлімдеді.
Ведомство сондай-ақ, салтанатты жиыннан кейін Экология, геология және табиғи ресурстар министрлігімен бірлесіп, ағаш отырғызу акциясын өткізу жоспарланып отырғанын хабарлады. Кейінгі жылдары мұндай акция дәстүрлі түрде 25 мамырға орай ұйымдастырылады.