Түлектердің 82%-ы ҰБТ-ға қатысуға ниет білдірді
<p style="text-align: justify;">Негізі ҰБТ-ға өтініш қа­был­дау мерзімі 10 мамыр­да аяқталды. Деген­мен де Білім және ғылым минис­тр­лігі екі түрлі санаттағы та­лапкерге 15 мамырға дейін өтініш беруге бола­ты­­нын айтады.</p>
Олардың бірі – Қазақстан Республикасының азаматы болып табылмайтын ұлты қазақ талапкер, екіншісі – шетелде оқу орнын бітіргендер. Биыл алғаш рет ҰБТ-ға өтініштің басым бөлігі онлайн-режімде қабылданды. Ұлттық тестілеу орталығының директоры Дидар Смағұловтың айтуынша, қабылданған өтінімдер саны бұрынғымен салыстырғанда рекордтық көрсеткішке жеткен. Оған онлайн-режімде құжат қабылдау ықпал етіпті.
«Биыл түлектердің 82%-ы ҰБТ-ға қатысуға ниет білдірді. Талапкерлер саны жыл сайынғы 70%-дық көрсеткіштен асып түсті. Онлайн форматтың артықшылығы көп. Ең бастысы, мектеп түлектеріне толықтай еркіндік беріп отыр. Өкінішке қарай осы уақытқа дейін мектеп әкімшілігі тарапынан үлгерімі төмен оқушылардың тестілеуді тапсыру мүмкіндігін шектеу фактілері орын алған. Енді бұл мәселе шешілді», деді Д.Смағұлов.
Министрліктің мәлімдеуінше, ҰБТ-ға 131 471 адамнан өтініш түскен, оның ішінде
111 017-сі – мектепті биыл бітіргендер, 20 454-і – колледж және бұрынғы мектеп түлектері. ҰБТ-ға қатысуға 100 мыңнан аса өтініш онлайн қабылданды.
Мектепті биыл бітіріп, ҰБТ-да ең жоғары 140 ұпайды әділ жинаған әр түлекке соңғы модельдегі ноутбук сыйға тартылмақ. Ал тестілеуге кіргізу кезінде заңсыз зат табылған талапкер тестілеуге жіберілмейді және осы жылы ҰБТ тапсыру мүмкіндігінен айырылады. ҰБТ аяқталғаннан кейін күнтізбелік жылдың 25 тамызына дейін бейнебақылау жазбалары талданады. Талапкердің тыйым салынған заттарды пайдаланғаны анықталса, оның ҰБТ және білім беру грантын тағайындау конкурсының нәтижелері жойылады.