Қырық сегіз адамды қызыл жалыннан құтқарған
<p style="text-align: justify;">«...Алаңсыз ұйықтап жат­қанымда орындығымның асты жып-жылы болып кетті. Көзімді ашсам, астымда от жанып жатыр. Бірден жүргізушіге жүгіріп барып, автобуста өрт шыққанын ха­барлап, көлікті тоқтатуын сұ­радым. Бірақ ол менің сөзіме сен­бей қойды. Ал екінші жүргі­зуші шырт ұйқыда. Көп кідіруге бол­майтындықтан оны оятуға тура келді. Осыдан кейін ғана ол автобусты тоқтатты. Ал қай­тадан орныма келсем, қызыл жа­лын біршама жерді шарпып үлгеріпті. «Жанып жатырмыз» деп айқайласам адамдар үн қатпайды. Сөйтсем автобустың артқы бөлігінде отырғандардың көбі көк түтінге уланып үлгерген екен. Ал кейбірі не болғанын түсінбей, аңырып қарап отыр. Тіпті жүргізуші автобустың есі­гін де ашпады. Содан кейін екі есік­ті тепкілеп, итеріп жартылай­ аштым. Алдымен балаларды да­лаға шығардым. Көтеріп алып, бірі­нен кейін бірін лақтыра бер­дім. Өйткені өрт күшейіп барады. Ал жүргізуші өрт сөндіру құ­ралымен тілсіз жауды сөндіріп жат­ты. Бірақ қызыл жалын дес берер емес...».</p>
2018 жылдың тамыз айының 4-інде «Семей – Новосібір» бағытындағы автобуспен жолға шығып, түнгі сағат 4 шамасында көлікте тұтанған тілсіз жаумен арпалысып, небәрі 1 минут 45 секундта 48 адамды құтқарған семейлік Ержан Омарханов оқыс оқиғаны осылай еске алады.
Бір қорқыныштысы, автобус небәрі 4 минуттың ішінде жанып кеткен көрінеді. Ал Ержан Омарханов құтқарған 48 жолаушының 12-сі бала екен. Автобус ішінде 3 айлық сәбиден егде тартқан зейнеткерге дейінгі санаттағы адамдар болыпты.
Кейіпкеріміз Ресейге көлік сатып алу мақсатында жолға шыққан екен. Алайда «байтал түгіл бас қайғы» дегендей, автобустағы өрт кезінде адамдарды сыртқа шығарып, жан алысып, жан берісіп жүргенде құжаттары мен 1 миллион, 400 мың теңге көлеміндегі ақшасынан айырылады.
Автобус Семейдегі «Сұлу» автобекетінен шығыпты. Кейін Ержан автобекеттің басшылығына хабарласып, адамдардың өміріне немқұрайлы қарауға болмайтынын айтқан. Бірақ автобекеттегілер автобустың Ресей еліне тиесілі екенін, барлық арыз-шағымды соларға айту керек екенін жеткізіпті. «Қоғамдық көлік Семейге келген соң техникалық тексеру жүргізілуі керек. Мен осыны айтқанда автобекет басшысы телефон тұтқасын қоя салды. Содан бері жауаптан қашып жүр. Кейін маған мәскеулік заңгер автобус жолға шықпас бұрын Қазақстанда тексерілуі керек екенін айтты. Бірнеше күн өткен соң жанып кеткен ақшамды өндіріп алу үшін автобус иесін іздедім. Оны достарымның көмегімен таптым. Бірақ ол маған тек 150 мың рубль ғана қайтарды» дейді бейбіт күннің батыры.
Осы оқиғадан кейін Ержанның ерлігіне сүйінген халық оны төбесіне көтеріп, алғыстарын айтып, ризашылықтарын білдіреді. Семейлік жерлестері атынан жергілікті кәсіпкер, «Гордорстрой» ЖШС директоры Бауыржан Қайрамбаев 1 миллион теңге табыстайды. Жақында көп жылдан бері пәтер жалдап тұратын кейіпкерімізге «Ланкастер» атты алматылық компанияның басшылары Семей қаласынан үй алып бергенін естідік.
Ержан Омарханов – 4 баланың әкесі. Негізінен кәсіпкерлікпен шұғылданса да, бір тиын алмастан грек-рим күресінен жаттықтырушы ретінде шәкірт тәрбиелеп, жарыстарға апарады. «Семейдің іргесінде Бобровка деген саяжайлы ауыл бар. Тұрғындары жан-жақтағы ауылдардан келген. Осы ауылдағы мектептің спорт залында 2013 жылдан бері балаларды күреске баулып жүрміз. Өзім осы күрес түрімен 12 жасымнан бастап айналысқанмын. Бізде 107 бала бар. Мен Әли Советханов деген бапкермен бірлесе жұмыс істеймін. Арнайы спорттық білімім жоқ. 1990 жылдары білім алуға мүмкіндік болмады. Негізгі жұмысым – Ресей мен Қазақстан арасында көлік әкеп сату» дейді Ержан.
Қуаныштысы сол, қайсар жігіт 2019 жылы «Қазақстанның 100 жаңа есімі» жобасының үшінші кезеңінде жеңімпаз атанды.
Сол кезде тілсіз жаудың құрығынан аман шыққан жолаушылар әлі күнге дейін Ержанға хабарласып, жағдайын біліп тұрады екен. Айтпақшы, бейбіт күннің батырын былтыр Ресейдің танымал тележурналисі Андрей Малахов өз бағдарламасына қонаққа шақырғаны да белгілі. Бірақ кейіпкеріміз бұл ұсыныстан бас тартыпты. «Ресей тілшілерінің арасында сол күні «Жолаушыларды басқа адам құтқарды» деп ақпарат таратқандары да кездесті. Маған ешқандай да атақтың қажеті жоқ. Ешуақытта біреуге хабарласып: «оларды мен құтқардым» деп жар салған емеспін. Бәріне бір Алла куә ғой. Өтірік ақпарат таратқандарды өз ұяттарына қалдырдым» дейді ол.
Көрші елге жиі қатынап тұратын оны ресейліктердің көбі жақсы біледі екен. Барған жерінде танып, келіп, ризашылықтарын білдіріп, суретке түсетін көрінеді. Айтпақшы, дағыстандық саясаттанушы, журналист Руслан Курбанов өзінің инстаграммдағы парақшасында: «Егер бұл жерде ресейлік болғанда баяғыда-ақ халық қаһарманы қылар едік. Ал шағын ғана шаһардан шыққан бұл қазақ ешқайда барып, ерлігін бұлдап жүрген жоқ. Оның еңбегін ескермедік. Ұмыттық» деп жазыпты.
Десек те, Ержан Омархановтың ерлігін туған халқы біледі. Сол үшін де құрметтеп, қадірлейді.
СЕМЕЙ