Оқушылар шыңдалатын орда
<p style="text-align: justify;">Отандық экономикаға алғаш инвестиция салған шетел инвесторы –­ «Шеврон» компаниясы атыраулық оқушылар мен жастарға ерекше сый жасады. Компания демеушілігімен бой көтерген сәулетті сарайдың аумағы 18 833 шаршы метрді құрайды.</p>
Аталған ғимараттың құрылысы 2018 жылы басталған еді. Ғимаратта төрт қабат бар. Мұнда оқушылар мен жастар шығармашылық қабілетін, спорттық шеберлігін шыңдайды. Сондай-ақ сарайда ғылым мен техника, өнер, мәдениет және спорт секілді салаларға қатысты жеті бағытта 63 үйірме жұмыс істемек.
– Оқушыларға ұлттық мәдениетіміз бен салт-дәстүріміз туралы мағлұмат алуға, планетарийден аспан әлемімен танысуға мүмкіндік жасалып отыр. Мұнда күніне екі ауысымда 1 500 бала өнермен, спортпен, шығармашылықпен шұғылдана алады. Оқушылар мен жастардың қабілетін түрлі бағытта шыңдау үшін 200-ден астам мұғалім жұмыспен қамтылады, – дейді Атырау қалалық білім бөлімінің басшысы Феруза Шаңгереева.
Қала көркіне сән берген әсем сарайдың жұмысы 1 қыркүйекте басталады деп күтілуде.
АТЫРАУ