Ауруханаға матрас сыйлады
<p style="text-align: justify;">Ел өміріне ауыртпалық болып киліккен коронавирус індетіне қарсы күресте еңбек етіп жүрген дәрігерлерді қолдау аясында Jas Otan жастар қанаты Ақтау қаласында «Алғыс пакеттерін» тарату акциясын ұйымдастырды.</p>
Әрбір пакетте дәрігерлерге арналған жеміс-жидектер, тәттілер мен сүт өнімдері салынған. Волонтердің айтуынша, бұл акция еліміздің барлық өңірінде жалғасын табуда.
– Бүгінде Ақтау қаласында коронавирус инфекциясына қарсы дәрігерлер күн мен түн демей дамылсыз еңбек етуде. Ақтау қаласы бойынша 6 қонақүйге орналастырылған дәрігерлерге, мейірбикелерге күнбе-күн облыстық мәслихат депутаттары, кәсіпкерлер, Jas Otan ЖҚ белсенділері мен волонтерлер жеміс-жидектер, сүт өнімдері, түрлі тәттілерді әкеліп, үлестіріп жүрміз. Басты мақсатымыз – дәрігерлерге алғыс айтып, қиын уақытта қолдау білдіру. Біз бұл ауруды бірлесіп жеңеміз деп сенемін, – деді филиал төрағасы Наурызбек Мағдатов.
Жақсы жұмыс жалғасын тауып, арада бір күн өткенде Jas Otan белсенділері көпбейінді провизорлық стационарға 35 дана матрас жеткізді. Қазір Маңғыстау облыстық ауруханасы көпбейінді провизорлық стационарға ауыстырылды. Науқастардың көптеп түсуіне байланысты ауыр науқастарға арналған матрас жетіспеушілігі байқалды. Осыған байланысты жасотандықтар қолдауымен, демеушілер көмегімен волонтерлер матрастарды сатып алып, ауруханаға табыс етті.
– Біз демеушілердің арқасында 35 матрас сатып алып, көпсалалы провизорлық стационарға жеткіздік. Бұған дейін аурухана басшылығы матрастар мен төсек-орын тапшылығы туралы мәселені айтқан болатын. Сондықтан келесі аптадан бастап төсек-орын тігу бойынша жаңа акцияны іске қосуды шештік. Бірлескен күш-жігерімізді пайдаланып, қоғамға үлес қоссақ дейміз – деді Н.Мағдатов.
«Қазіргі жағдайға байланысты барша қайырымды жандар бір кісідей атсалысып жатыр. Осыдан 4-5 күн бұрын облыстық Jas Otan жастар қанатының төрағасы хабарласып, қандай қажетті құралдар керек екенін сұраған. Реанимациядағы науқастарға матрастар керек екенін айтып едім. Жұмыла тірлік қылсақ қиындықты еңсеріп, қауіптен тез құтыламыз. Алайда әр адам жауапкершілікті терең сезінбейінше, қауіп сейілмейді. Аурудан сақтанудың жалғыз жолы – оқшаулану, көпшілік ортада маска тағып, антисептикті қорғаныш ретінде пайдалану», деді Маңғыстау облыстық ауруханасының бас мейірбикесі Айтбиби Өтегенова.
Көмектің үлкен-кішісі жоқ, сондықтан белсенді жастардың еңбегі – үлкен үлес.
Маңғыстау облысы