Теріскейдегі өндіріс өрісі

Ауыл шаруашылығы, инвестиция тарту және құрылыс бойынша да өңірдің даму қарқыны жоғары. Соңғы айда бюджет шығындары белгіленген межеден 2 млрд теңгеге артты. Мұның бәрі әлеуметтік-экономикалық дамудың оң динамикасын сақтап отыр. Бұл динамика жыл соңы­на дейін сақталады деген үміт бар, оған қол жеткізуге резерв жеткілікті.

Облыс әкімі Құмар Ақса­қалов әр саладағы экономи­ка­лық өсімдерге тоқталды. Атап айтқанда, ауыл шаруа­шы­лығының өсімі былтырғы сәй­кес кезеңмен салыстырғанда 102,8%-ға артқаны айтылды. Өндірілген өнім көлемі – 103,9 млрд теңге. Бұл – былтырғыдан 10 млрд теңгеге артық деген сөз. Өсімдік шаруашылығы өнімдері былтырғыдан кем емес. Мал ша­руашылығы өнімдері 102,9%-ға артқан.

Дегенмен, кейбір аудандар­да өндіріс көрсеткіштері был­тырғымен салыстырғанда төмен. Мәселен, облыс орталығының іргесіндегі Қызылжар ауда­нын­дағы ауылшаруашылық өнімі былтырғымен салыстырған­да 92,7% болып отыр. Яғни өнім көлемі 15,1 млрд тең­ге­ге төмендеді деген сөз. Өнді­ріс­тің төмендеуі негізінен жұмырт­қаның азаю себебінен болып отыр. Дегенмен, биыл маусым айымен салыстырғанда шілдеде 13 пайызға артты.

Облыстағы өңдеу кәсіпорын­дары жақсы нәтиже көрсетуде. Мәселен, «Маслодел» ЖШС өні­мін былтырғы сәйкес мерзім­мен салыстырғанда 46%-ға арт­тырып, 45 мың тоннадан ар­тық өнім шығарды. Соның ішін­де сүт, айран, қаймақ, май және тағы басқалары бар. Кә­сіп­­орында 340 адам жұмыс іс­тейді, еңбекақылары биыл 20 па­йызға жоғарылады. Деңгейі осы кәсіпорынмен қарайлас «Молпродукт» ЖШС-да 220 адам жұмыс істейді. Компания жыл басынан бері 41,5 мың тонна өнім шығарды.

Ет өңдеу кәсіпорындарының қарқыны көңіл қуантады. Айта­лық «Казмясопродукт» ЖШС-сы жоспарлы межені 108 пайызға орындады. «СК – Мясопродукт» ЖШС да қалысар емес, кәсіпорын жыл басынан бері 135 млн тең­генің 180 тоннадан артық шұ­жығын өндірді.

Отырыста айтылғандай, жеті айда 80 млрд теңгенің азық-түлігі шығарылды. Бұл был­тырғыдан 16 млрд теңгеге артық. Әкімдік жыл қорытындысы бойынша өсім 4 пайыз болады деп межелеген, бірақ көрсеткіш асып түсетін түрі бар.

Өнеркәсіптің былтырғы жыл­дың сәйкес мерзімімен салыс­тырғандағы өсімі 108,1 па­йыз болды. Ал республика бойынша орташа көрсеткіш 101,3 пайыз екенін айта кетейік. Яғни өсім 27 млрд теңгеге артты.

– Оң динамика біздің зауыт­тардың алған тапсырыстарының өсімінде де байқалды. Ол 16%-ға артып, 38 млрд теңгеге жетті. Соның ішінде «Мұнаймаш» ком­паниясының өсімі 106,1%-ды, «Петромашзаводтың» өсімі 125,7%-ды құрады. «Петропавлдың метал­конструк­ция зауыты» 1,7 млрд теңге­нің 2,5 мың тонна өні­мін шығарды. «Един­ство» ЖШС өндіріс көле­мін 42 пайызға дейін ұлғайт­ты, – деді облыс әкімі.

Негізгі капиталға салынған инвестиция көлемі де биыл 18,8%-ға артты. Соның нәти­жесінде 120 млрд теңге өндіріске құ­йы­лып, былтырғымен салыс­тырғанда 19 млрд теңгеге артық болды.

Облыс әкімдігінде өткен оты­рыста көз жеткізгеніміздей, жаман індеттің қыспағына қа­рамай еліміздің терістігінде эко­номиканың барлық саласы бойынша өсім бар. Облыс әкімі бұл динамика жыл соңына дейін сақталатынына сенім білдірді.

Солтүстік Қазақстан облысы