Клуб мүшелерінің байқауы

Жуырда елордада Ұлттық академиялық кітапханада «Ғылыми-техникалық прогресс және оның әлеуметтік салдарлары» атты тақырыпта «Самұрық-Қазына» ҰӘҚ» АҚ «Эксперт» клубының отырысы болып өтті. Оған мемлекеттік органдар мен өндірістік компаниялар, сондай-ақ қоғамдық ұйымдар өкілдері келіп, өз пікірлерін ортаға салды. Басқосуды аталған клуб жетекшісі Нұрлан Ерімбетов жүргізіп отырды.

Жиында еліміздің үдемелі индустриялық-инновациялық даму бағдарламасына сәйкес республикада өндірістің жаңа технологиялары мен инновацияларын енгізу бойынша шаралар өткізіліп жатқаны айтылды. Сондай-ақ, «Эксперт» клубының жетекшісі Н.Ерімбетов аталған бағдарламаның көптеген сұрақтарды тудыратын және жеке талқылауды талап ететін кері жақтары да жоқ еместігін алға тартты. Ол өндірістердің жаңа түрлерін енгізу, жабдықтарды және өзге де жаңа технологияларды компьютерлендіру жұмыс орындарын мәжбүрлеп қысқартуға алып келмей ме, бұл жер-жерлерде қалыпты әлеуметтік ахуалды тұрақсыздандыруға әкеліп соқпай ма деген сынды өзге де мәселелерді жиылған жұртшылыққа ұсынды. Басқосуға келген өкілдердің кейбірі бұл ретте жаңа технологиялардың әсерінен адам санының қысқаруы болғанымен, саланың өзге де жұмыстары жетерлік екенін және алдағы уақытта оларға мүмкіндігінше басқа да жұмыстар қарастырылатындығын айтты. Сонымен қатар, олар БАҚ өкілдерінің бірқатар сұрақтарына жауап берді.

«Егемен-ақпарат».