Бес жасар балдырған Абай өлеңін жатқа оқып, жүлде алды
<p style="text-align: justify;">«Мен де жұлдыз боламын» балалар байқауының биылғы бас тақырыбы Абай Құнанбайұлының 175 жылдық мерейтойына арналған екен. Жақында жас таланттарды іріктеп, оза шапқандарға арнайы жүлде беретін байқаудың ақтық сайысы өтті.</p>
Осы байқаудың «Көркем сөз оқу» аталымына Алматы облысының Кербұлақ ауданынан барып қатысқан Бағым Сақижан топ жарып шығыпты. Бағымның жасы – бесте. Ол биыл Сарыөзек кентіндегі №49 орта мектептің «0» сыныбына оқуға барды. Сүйкімді қыз тілі шыққаннан тақпақ жаттап, мәнерлеп оқуға дағдыланыпты. Бағым Абай атасының мерейтойына орай данышпан ақынның көп өлеңін жаттап алған екен, жақында өткен «Мен де жұлдыз боламын» байқауында «Ата-анаға көз қуаныш» өлеңін жатқа оқыды. Кішкентай көркемсөз оқушының жатық тілі мен жағымды үні, сахнадағы сән-салтанаты мен Ұлы Абай өлеңдеріне деген құрметі қазылар алқасын тәнті етіп, бірінші орынға ие болды. Байқау ұйымдастырушылары Бағымға келер жылы Түркия елінде өтетін балалар шығармашылығын дамытуға арналған халықарлық байқауға қатысуға жолдама берді.
Айтпақшы, осы байқаудың «Би» аталымына қатысқан тағы бір топ жетісулық балалар жүлделі болыпты. Ескелді аудандық мәдениет үйі жанынан құрылған «АлиНаз» би ансамблі де «Мен де жұлдыз боламын» байқауынан жүлделі екінші орын алып қайтты.
Алматы облысы