Арманы асқақ Асылбек

Арбаға танылғанын ар сана­майтын Асылбектің бү­гін­гі таңда жүзеге асырып жат­қан бастамасы кейбір қала­да жоқ десек те болады. Ал Алматы облысына қа­рас­ты Қарасай ауданында алғаш­қылардың бірі болып, 2017 жылы ашқан «Күш-қуат» оңалту орталығының жұ­­­мысы жанданғаннан бері өзі­­­мен тағдырлас талай адам­­дардың өмірге деген құш­тар­лық сезімін оятып, жан жа­ра­сының жазылуына себеп­ші болып келеді.

Орталықты басқарып отыр­ған Асылбектің бұл ба­ғыт­та жұмыс істеуіне өзі­нің басынан кешкені мен жеке жаттығуларының нәти­же­сінде жағдайының көңіл қуан­тарлықтай қалыпқа жет­кені басты негізге айнал­ды. Осылайша, басқа да мүм­кін­дігі шектеулі жандарға үміт сәулесін сыйлайын деген ниетпен ол аталған ор­та­­лықты ашуға бел буған. Асыл­бектің жоспарлы жұ­мы­­сын жүзеге асыруына Алматы облысы «Атамекен» кәсіпкерлік палатасының Қарасай аудандық филиалы қолғабыс еткенін де айта кеткен жөн. Осы орталықтан алдымен бизнестің қыр-сырын үйренетіндей білімін жетілдіріп, арнайы курс­ты оқып шықты. Кейін оған аудандық әкімдік Қаскелеңдегі «Алтын ауыл» ықшам ауданынан жертөлені тиімді бағамен жалға алуына қолдау білдірді.

Ашылғанына үш жыл болса да «Күш-қуат» оңалту орта­лы­ғынан осы уақытқа де­йін жағдайы жақсарып, Асылбек Жалдыбаевқа алғы­сын жеткізгендер де жетерлік. Келушілердің барлығы мұн­да­ғы түрлі құрал-жаб­дық­тарға толы кең бөл­ме­­лерде жаттығуларын жа­сап, білікті мамандардың ақыл-кеңесіне жүгіне алады. Бір айта кетерлігі, осы жерге Нұр-Сұлтан, Шымкент сияқты алыс шалғай аймақ­тар­дан да адамдар ем-домын қабылдауға келіп тұ­ра­ды. Олар үшін жатар орын да қарастырылған. Ал жоғарыда біз айтқан жаттығуға арналған құрал-жаб­дықтардың барлығы орта­лық басшысының жеке қолдауымен арнайы жасал­ған. Өйткені оның осы ба­ғыт­­­та жұмыс істейтін арна­йы шағын өндіріс орны бар екенін де ерекше айтуға бо­ла­­ды. Сол арқылы кәсіпке жаны жақын Асылбек түрлі оңалту орталықтарынан арнайы тапсырыспен жаттығу құралдарын да өндіріп шы­ға­руда.

Тағдырлас жандардың өмірге деген құштарлығын арт­тырсам деп жүрген Асыл­бек­тің арқасынан қағып, игі ісін құптайтын жандар да бар. Әңгіме барысында А.Жалдыбаев әсіресе, Қас­ке­лең қаласының әкімі Асқар Мұқашевтің жомарт­ты­ғына ерекше тоқталды.

– Арбадағы адамдар үшін біз­дің орталыққа бас­пал­дақ­пен кіріп-шығу, расымен де қиынға түсті. Бірде осыны байқаған қала басшысы Асқар Өкенұлы өз қаражаты есебінен азаматтығын танытып, жоғары-төмен автоматты түрде жылжитын пандусты сыйға тартты. Осы қолдауы үшін ризашылығымды біл­ді­ремін, – дейді «Күш-қуат» оңалту орталығының директоры.

Асылбек Жалдыбаев бі­лік­­ті заңгер болуды армандап, жоғары оқу орнын да тәмамдаған. Алайда айтып келмейтін автокөлік апаты оның бола­ша­ғын бұлыңғыр етті... Ке­йіп­ке­ріміз сонда да келешегіне күлімдеп қарауды мақсат етіп, өн бойы­­­на дарыған спорттық қабі­летін мүмкіндігі шек­теу­лі болса да дамыта түсе­ді. Соның нәтижесінде осы уақытқа дейін түрлі пара­лим­пиадалық ойындарда қол күресі, жүзу сияқты спорт түрлерінен жеңіспен оралып жүр. Тіпті, ауданның абыройын облыстық жарыс­тар­да да қорғап, 1-2 орындарды қанжығаға байлауды әдетке айналдырған. Осындай жемісті жетістіктерін мақтана еске алған жігерлі Асылбек былай дейді: «Адам қандай жағдайға түссе де өзін еш­қашан төмен санамауы керек. Қайғы-мұңға берілмей, онымен күресе білу – нағыз ерліктің ісі. Бізге өмір бір-ақ рет беріледі. Оны тамаша сүру өз қолымызда. Уақыты өтіп кеткендер қаншама. Сондықтан ғибратты ғұмыр кеше білген дұрыс».

Біз таныған Асылбек, міне, осындай. Оның ендігі мақ­саты – өзі басшылық етіп отырған оңалту орталығының көкжиегін кеңейтіп, мүге­дек­тігі бар жандарды жан-жақты қолдап, қолдан келгенше оларды аяқтарынан тік тұрғызу. Ол осы идеясын жүзеге асыру үшін мемлекет тарапынан қолдау күтетінін айтты. «Армансыз адам – қанатсыз құспен тең» дегендей, Асылбектің межелі мақсаты орындалуына біз де тілекшіміз.

Дидар МӘЛІКҰЛЫ,

журналист

Алматы облысы,

Қарасай ауданы,

Қаскелең қаласы