Азулы қарсыласпен жұдырықтасады
<p style="text-align: justify;">Әуесқой бокста біраз белесті бағын­дырып, бокс мамандарын өзінің мық­тылығымен мойындатқан отан­дасымыз Тұрсынбай Құлахметтің кәсіпқой боксқа ауысқаны баршаға белгілі.</p>
Боксшымыздың ісін жүргізетін MTK Kazakhstan менеджерлік компаниясының хабарлауынша, Құлахмет кәсіпқой бокстағы екінші кездесуін 11 қарашада өткізеді. Ұлыбританияда ұйымдастырылатын бокс кешінде шаршы алаңға шығатын жерлесіміздің бұл жолғы жекпе-жегінің жүгі ауыр болмақ. Өйткені орта салмақта өнер көрсететін өреніміз кәсіпқой бокста 14 кездесу өткізіп, бірде-бірінде жеңілмеген жергілікті боксшы Маклей Макгоуэнмен (14-0-1, 3 КО) WBC International вакантты титулы үшін жұдырықтасады.
Айта кетейік, Тұрсынбай Құлахмет кәсіпқой бокстағы дебюттік жекпе-жегін 23 тамызда Алматыда өткізіп, Сағадат Рахманқұловты (6-2, 4 КО) техникалық нокаутпен жеңген болатын.