Жезқазғандағы «жерұйық»
<p style="text-align: justify;">Былтыр Жезқазған қаласындағы балалар мен жасөспірімдер сарайының базасында «ЭкоОбраз» қоғамдық бірлестігі жобасының бастамасымен Жасыл технологиялардың ресурстық орталығы құрылған еді. Қазір мұндағы тәлімбақта 3 мыңнан аса көшет өсіп шықты.</p>
Аталған орталықтың жетекшісі Андрей Матвеев тәлімбақтағы көшеттерді өсіруге балалардың белсенді түрде атсалысып жүргенін мақтанышпен айтады.
– Балалар тұқым жинау мен оларды отырғызудан бастап өсірілген көшеттерді күтуге дейінгі аралықтағы жұмыстардың бәрін өз қолдарымен, зор ынтамен істейді, – дейді ол.
Орталықтағы тәлімбақта ағаштың әдемі сәнағаш (катальпа), киіз павловния және қарапайым өрік сынды үш түрі өсіріледі. Бұл өсімдіктер Жезқазған өңірінің климаттық ерекшеліктері ескеріліп таңдалған. Биылдың өзінде қалада отырғызылған 500 көшеттің 90%-дан астамы тамыр алып, жерсініп кеткен екен.
Тәлімбақтағы жұмыс мынадай үдеріс бойынша ұйымдастырылады: көктемде барлық көшет жылыжайда отырғызылады. Тамшылатып суару, гидрогель, вермикомпост сынды тәсілдер суаруға қажет судың мөлшерін үнемдеп қана қоймай, өсімдіктердің өсуі мен дамуын едәуір жылдамдатады. Егер қалыпты жағдайда каталпа көшеттерін өсіруге 2-3 жыл уақыт кетсе, мұнда 9 айдан 1,5 жылға дейін, ал павловния ағашын жарты жылдан кейін отырғыза беруге болады.
Бүгінгі таңда тәлімбақтың көлемін кеңейту бойынша жұмыстар қолға алынған. Birgemiz: Taza alem жобасының шағын грантының арқасында балалар мен жасөспірімдер сарайында тағы 220 шаршы метр құрғақ топырақ тамшылатып суару тәсілімен қамтамасыз етілмек. Бұдан бөлек қаладағы №26 гимназияның базасында қосымша алаң пайда болады.
Алдағы уақытта Жезқазғанның шап-шағын «жерұйығына» айналған тәлімбақта өсімдік түрлері көбейтіліп, емен, қайың, арша сияқты ағаш көшеттері өсірілмекші. Мамандар өздері айналысып жүрген берекелі істің Жезқазғанды ғана емес, басқа да өңірлерді жасыл желекке бөлеу жобасына игі әсерін тигізетініне бек сенімді.
Қарағанды облысы,
Жезқазған қаласы