Тәуелсіздік жолын безбендеу (Әл-Фараби атындағы ҚазҰУ-да Тұңғыш Президент – Елбасы Н.Ә.Назарбаев залы ашылды)
<p style="text-align: justify;">Егемендіктің ширек ғасырдан астам шежіресі Нұрсұлтан Назарбаев тұлғасынан айналып өте алмайтыны енді ақиқат. Тәуелсіздіктің елең-алаңында мемлекет басшылығына келген Елбасының ерен еңбегі, өзге елдермен терезесі тең қарым-қатынас орнатуда жүріп өткен жолы, айналасындағы көршілерімен тұңғыш рет шекарасын шегендеуі – бәрі де уақыт еншісіне енгенімен, ұмытылмауы – парыз бен қарыз.</p>
Тәуелсіздік тарихын безбендеудегі біткен істің бірі – Әл-Фараби атындағы ҚазҰУ-да Қазақстан Республикасының Тұңғыш Президенті – Елбасы Н.Ә.Назарбаев залының ашылуы болды.
Тұңғыш Президент күніне орайластырылған іс-шараға Қазақстан Республикасының Тұңғыш Президенті – Елбасы кітапханасының директоры, саяси ғылымдар докторы, профессор Әмірхан Рахымжанов, Әл-Фараби атындағы ҚазҰУ ректоры, академик Ғалымқайыр Мұтанов, университет ғалымдары, БАҚ және қоғам өкілдері қатысты. Олар БҰҰ-ның тұрақты даму бойынша «Академиялық ықпал» бағдарламасын жүзеге асыратын жаһандық хабтың жұмысымен танысты.
Бұл хабқа Әл-Фараби атындағы ҚазҰУ-дың «Мәңгілік ел» тарихи-көркем кешені жетекшілік етеді. Кешенге әл-Фараби музейі, «Алаш», «Абай», Қазақстан Республикасының Тұңғыш Президенті – Елбасы залдары, «Ұлы даланың жеті қыры», «Мәңгілік ел» экспозициялары кіреді. Меймандар жоғары оқу орнының ғылыми кітапханасымен танысып, XVII ғасырдың сирек кездесетін басылымдары мен бірегей араб, шағатай қолжазбаларын тамашалады.
Әмірхан Рахымжанов 300-ден астам әлемнің ірі жоғары оқу орынымен серіктестікке ие, мемлекеттің мықты кадрларын даярлайтын ұстахана ретінде Әл-Фараби атындағы ҚазҰУ-дың рөлін атап өтті.
«2009 жылғы 13 қазанда Н.Ә.Назарбаев «Қазақстан дағдарыстан кейінгі кезеңде: болашаққа қарай интеллектуалды серпін» дәрісін ҚазҰУ-да оқыған болатын. Бұл дәріс таяуда жарық көрген «Қазақстан Республикасының Тұңғыш Президенті – Елбасы Н.Ә.Назарбаевтың әлемнің жетекші университеттерінде оқыған дәрістері» кітабына енген. Тұсауы кесілген зал – тәуелсіз мемлекеттің құрылуы мен нығаюы тарихынан сыр шертетін материалдарды тоғыстырған ағарту орталығы. Елбасы мұрасы – ел келешегінің іргетасы. Бұл залға келген жоғары оқу орнының кез келген студенті мен қонағы дамуға қажетті серпінді ала алады», деді Әмірхан Рахымжанов.
Іс-шара барысында Елбасы кітапханасы университетке мекеменің авторлық 100 кітабын сыйға тартты. Бұл басылымдарды дайындаған жұмыс тобына Елбасы Кеңсесінің басшысы, саяси ғылымдар докторы, профессор М.Б.Қасымбеков жетекшілік еткен.
Әл-Фараби атындағы ҚазҰУ ректоры Ғалымқайыр Мұтанов Елбасы кітапханасының көпжылдық серіктестігіне ризашылығын білдіріп, Қазақстан Республикасының Тұңғыш Президенті залын құруда қолдау танытқанына алғысын айтты.
«Бұл залдың құндылығы – маңызды ақпараттардың магистранттарымыз және докторанттарымызға қолжетімді ете түсуінде. Бұл жерде еліміздің жетекші ғалымдары бастаған конференциялар мен форумдар өтетін болады. Зал материалдары әлі де толыға бермек. Бұл істің шымылдығын ашып, кітапханамыздың қорын ұлт тарихымен сусындатқан Елбасы кітапханасына алғысымыз зор», деді Ғалымқайыр Мұтанов.
Залдың қазіргі қоры тәуелсіздіктің алғашқы жылдарын қарастырған Елбасының ғылыми зерттеулері мен кітаптарынан, өзге де материалдардан құралған. Бұл жерде архив құжаттары көшірмелері, фото, бейнеқұжаттар, баспа материалдары, Елбасының балалық шағы мен студент кезі, еңбек жолы мен қоғамдық-саяси қызметі туралы фильмдер ұсынылған.
Студенттер мен ғалымдардың назарына ұсынылатын Елбасы кітапханасының «Қазақстан Республикасының Тұңғыш Президенті – Елбасы Н.Ә.Назарбаевтың әлемнің жетекші университеттерінде оқыған дәрістері» кітабы Нұрсұлтан Назарбаевтың Әл-Фараби атындағы ҚазҰУ сияқты ірі жоғары оқу орындарында оқыған дәрістерін қамтиды.
Зал ғылыми-практикалық конференциялар мен семинарлардың ұйтқысына, сарапшылар қауымдастығы мен мәдениет, білім саласының майталмандары мен мамандарының басын қосатын ошаққа айналмақ.
АЛМАТЫ