Жақсылыққа жұмылған жастар
<p style="text-align: justify;">Сәл саябырсыған індеттің қайта бас көтеріп келе жат­қ­а­­ны байқалады. Осыған бай­­ланысты волонтерлер қатарында елге көмек көрсе­тіп жүрген Сыр жастары жел­тоқ­сан айының басындағы ха­лық­­ара­лық ерік­тілер күні­не орай­ластырып, облыс орта­лы­ғы тұрғындарына бетперде таратты.</p>
«Қамқор» бағытында ұйымдастырылған бұл іс-шараға мектептердегі жастар үлкен үлес қосты. Сонымен қатар қалада атаулы күн аясында іс-шара ұйымдастырылып, волонтерлік қызметті дамытуға үлес қосқан 20-дан астам жас арнайы номинациямен марапатталды.
Облыс орталығындағы еріктілер білім бағыты бойынша ұйымдастырылатын шараларды да ұмыт қалдырған жоқ. Биыл мектеп бітірушілер үшін ҰБТ пәндері бойынша дайындық сабақтары өтті. Аудан жастары да түрлі бағытта бастама көтеріп, елдік іске ерекше үлес қосып келеді. Мысалы, Шиелі ауданы жастары төтенше жағдайлар, №13 өрт сөндіру бөлімі, №16 өрт сөндіру бекеті қызметкерлерімен бірігіп, тұрғындарға «Тұрмыстағы өрт қауіпсіздігі», «Көмірқышқыл газынан уланудан сақтану», «Сіріңке – балалар ойыншығы емес» тақырыптарында үгіт-насихат жұмыстарын жүргізді. Акция аясында 6 040 үйді аралап, 8 723 үнпарақ таратты. Жалағаштықтар да жанашырлық танытатын шаралардан сырт қалған жоқ. Жыл басынан бері ауданда 65 қайырымдылық акциясы ұйымдастырылып, 1 325 адамға 28 млн 500 мың теңгенің көмегі көрсетілген. Жуырда әлеуметтік жағынан аз қамтылғандарға, асыраушысынан айырылған қарттарға, тұрмысы төмен 120 отбасына 2 млн 305 мың теңгеге отын мен азық-түлік жеткізіліп берілді.
Қызылорда облысы