«Қайрат» қарымды, «Ақтөбе» алымды
<p style="text-align: justify;">Сенбі күні футзалдан УЕФА Чем­пион­дар лигасының 1/16 фина­лындағы бірқатар матч өтті. Айтулы додада бақ сынап жатқан Қазақ­стан­ның екі бірдей командасы өз ойындарын қонақта өткізіп, қарсылас­тарынан басым түсті.</p>
Мәселен, Беларусьтің Могилев қаласында жергілікті «ВитЭн» клубымен ойнаған Алматының «Қайраты» 5:2 есебімен жеңіске жетіп, жарыстың келесі кезеңіне жолдама алды. Матчтың бірінші кезеңінде жерлестеріміз қарсылас команда қақпасына жауапсыз үш гол соқты. Ойынның небары 11-секундында Савио есепті ашса, Умберто (16-минут) мен Диего (18-минут) өз есімдерін таблоға жаздыртты. Ал екінші таймда Біржан Оразов (34-минут) пен Дуглас Коста (36-минут) бір-бір гол соғып, «Қайратқа» жеңіс сыйлады.
Сонымен қатар «Ақтөбе» командасы да сырт алаңда Грекияның АЕК клубынан 5:2 есебімен басым түсті. Бұл кездесуде «Ақтөбе» ұжымынан Бекжан Дәулетов (16-минут), Оливейра (21), Дмитрий Клочко (27), Асхат Көлбаев (32) және Нұрбек Қарағұлов (36) мергендігімен көзге түсті. Енді жерлестеріміздің келесі қарсыласы 20 қаңтарда өтетін жеребе тарту рәсімінде белгілі болады. Ал 1/8 финалдың ойындары 16-21 ақпан аралығына жоспарланған. Келесі кезеңнің бәсекелері де бір ойыннан тұрады.