Бұрымдылар бес алтын олжалады
<p style="text-align: justify;">Сербияда қыздар арасында бокстан халықаралық «Ұлттар кубогы» жарысы өз мәресіне жетті. Байрақты бә­се­ке­де жер­лестеріміз үздіктер қата­ры­нан кө­рініп, жалпы саны 8 жүлде жеңіп алды.</p>
Пандемияға байланысты ұзақ үзілістен кейін шаршы алаңға оралған Қазақстан құрамасының былғары қолғап шеберлері Сербиядағы турнирде тәуір нәтиже көрсетіп, жанкүйерлердің көңілінен шыға білді. Себебі жарысқа барған 9 боксшының 8-і жүлдегерлер қатарынан көрінді. Атап айтар болсақ, Арайлым Марат (48 кг), Дина Жоламан (54 кг), Владислава Кухта (57 кг), Римма Волосенко (60 кг) мен Ләззат Күнгейбаева (+81 кг) еш қиындықсыз финалға дейін жетіп, алтын медаль үшін өткен жекпе-жекте де аянып қалған жоқ. Нәтижесінде, бес боксшымыз да алтыннан алқа тақты. Ал финалға шыққан тағы бір жерлесіміз Гүлсая Ержан (+81 кг) бас жүлде үшін өткен бәсекеде қарсыласына жол беріп, күміспен күптелді. Сонымен қатар Валентина Хальзова (69 кг) мен Марина Вольнова (75 кг) қола жүлдені қанағат тұтты.