«Қазхромның» рекорды
<p style="text-align: justify;">2020 жылдың күрделі өрілгеніне қарамастан, «Қазхром» трансұлттық компаниясы феррохром өндірісі бойынша рекордтық көрсеткішке қол жеткізді. Компания былтыр 1,84 млн метрикалық тонна ферроқорытпа өндірді. Ақсу мен Ақтөбедегі қос зауыттың бұл көрсеткіші 2019 жылғы көлемнен 1,7 пайызға көп.</p>
Компания ең алдымен өндіру пештерін жақсарту бағытында техникалық шаралар қабылдағаны белгілі. Осыған байланысты құрылған даму стратегиясын іске асыру нәтижесінде дайын өнім өндірісінің жүйелі өсімі қамтамасыз етілуде.
– Компания ферроқорытпа өнімдерінің өндірісін арттыруға бағытталған бірнеше маңызды стратегиялық бастаманы жүзеге асыруда. Ақтөбе ферроқорытпа зауыты №4 балқыту цехының пештері жобалық қуатына шығарылды. Зауыт мамандарының тобы ауқымды жұмыс атқарды. Пандемия тұсында өз күштерімен технологиялық процестерді жолға қойып, күрделі жобаларды жүзеге асыратын жабдықтарды жаңартты. Сондай-ақ біз ферроқорытпа зауытын шикізатпен қамдау жүйесін барынша тұрақты ету үшін жүйелі жұмыс істеп жатырмыз. Дөң тау-кен байыту комбинатында Қазақстан Тәуелсіздігінің 10 жылдығы атындағы шахтаның екінші кезегін салу жалғасуда. Біз бәсекеге қабілетті, нарық өзгерістеріне икемді компания болып қалу үшін ең тиімді инновациялық шешімдерді қолдануға, озық тәжірибелерді қабылдауға және өз идеяларымызды дамытуға тырысамыз, – деді «Қазхром» ТҰК» АҚ президенті Арман Есенжолов.
Былтыр «Қазхром» компаниясы 25 жылдығын атап өтуге тиіс-тін. Алайда мерейлі дата коронавирус пандемиясымен тұспа-тұс келіп, жоба-жоспарларға түзету енгізілді. Сондықтан компания 25 жылдыққа бөлінген қаражатты COVID-19-бен күресу және алдын алу шараларына бағыттады. Қызметкерлер мен олардың отбасыларына дәрі-дәрмектер сатып алынып, медициналық орталықтарға көмек көрсетілген. Кәсіпорынның еріктілері үлкен істің басы-қасында жүріп, науқас әріптестеріне, зейнеткерлерге қажетті дәрі-дәрмектер мен азық-түліктер жеткізді. Медицина қызметкерлеріне түскі ас пен маскалар үлестірілді. Вирустың алдын алу шаралары жайында құлағдар етіп, ақпараттандырып жүрді. Ақтөбе ферроқорытпа зауыты оттегі баллондарын толтырумен және Бобров аппаратына арналған арнайы жалғастырғыш тетіктер шығарумен айналысты.
«Осы орайда, компания пандемияға байланысты тәуекелдер мен қатерлерге қарамастан, өзінің өндірістік жоспарларын тиянақты орындап шықты. Филиалдардың барлығында COVID-19-ға қарсы қауіпсіздік шаралары күшейтілген. Кәсіпорындардағы өндірістік персонал қосымша жеке қорғаныс құралдарымен қамтамасыз етілді. Өндіріс орындарында, көліктерде күшейтілген дезинфекция режімі жұмыс істеді. Барлық бақылау өткізу қосындары жанаспайтын термометрлермен және тепловизорлармен жабдықталған», деп хабарлады компанияның баспасөз қызметі.
ERG құрамындағы компания ширек ғасырда 31,2 млн тонна ферроқорытпа өндірген. «Қазхром» ТҰК» АҚ ферроқорытпалары Қытай, Жапония, АҚШ, Еуропалық одақ елдеріндегі және Оңтүстік-Шығыс Азиядағы жЕтекші болат өндірушілерге жеткізіледі. 2020 жылы 1,7 млн тоннадан астам ферроқорытпа экспортталған.