Ит балақтан алып тұр

Оқыс оқиғалардан кейін жауапты мекемелер қаңғыбас иттер­ге қарсы күрес шараларын жандандыра бастады. Үйреншікті әдет. Ши шықпай, шара қолданылып, көңіл аударыла бермейді. Әйтпесе, Көкшетау қаласының шеткі аудандары тұрмақ, орта­лығының өзінде қарғыбау тағыл­ма­ған, тұмылдырық кигізілмеген иесіз иттер үйір-үйірімен қаңғып жүр.

– Ауыл тұрғындарына иттеріне ие бол­уы керектігі жөнінде әлденеше рет ескерттік. Бұл жолы мектептен келе жатқан інісін қарсы алуға шық­­қан оқушы қызға қаңғырған иттер бас салған, – дейді Краснояр ауы­лы әкім­ді­гінің бас маманы Жанат Әубәкіров, – адамға ауыз салған соң құ­тырған деп күмәндануға да әб­ден бо­лады. Қазір мән-жай мұқият тек­се­рілу­де.

Шалғайдағы елді мекендерде бұл мәсе­ленің қаншалықты шешіліп жат­қан­дығы белгісіз. Жаман індет жай­ла­­ғалы қарға адым жер ұзап шығуға қай­мығатын ауыл тұрғындары «бас жа­рылса – бөрік, қол сынса жең ішін­де» деп жүре берулері де мүмкін. Облыстық бала­лар ауруханасына былтыр ит қап­қан 156 бала медициналық көмек алуға жүгінгендігі соның айғағы болса керек. Биыл­ғы жылы осындай үш оқиға орын алып отыр.

– Краснояр ауылынан жеткізілген оқушы қызға алғашқы көмек көрсе­тіл­ді. Құ­тыру ауруының алдын алуға екпе егіл­ді, – дейді травматолог дәрігер Сергей Вурц.

Дегенмен иесіз иттер талаған жүз­де­ген баланың жүрегі шайлығып, жүй­кесіне салмақ түспеді кім айта алар?! Қазір көзі шалғандардың айтуы­на қа­ра­ғанда, бұралқы «достардың» қа­ла­ның жеке секторларында, әсіресе Краснояр ауылындағы бұрынғы ет комбинаты, облыс орталығындағы Жайлау және Зас­танционный шағын аудандарында тым көбейіп кеткендігі белгілі болып отыр. Өкінішке қарай, таяуда осы шағын аудандарда қаңғыбас иттердің адам­ға шабуыл жасауының екі оқиғасы тірке­ліпті.

– Көз байлана үйге қайтып келе жат­қа­нымда, тайыншадай екі алабай ит тап берді,– дейді қаңғыбас иттен зардап шек­кен қала тұрғыны Тұрар Мағзұмов. – Жан ұшырып қорғануға тырыстым. Мұн­дай жағдай бірнеше рет орын алды. Әрбір оқиғадан кейін төрт рет шағымдандым. Бірақ еш­қандай нәтиже шығатын емес. Көр­ші­леріме де «ит бақсаң, ие бол» деп ескерт­кенмін. Олар да жұрт сөзін ескерер емес. Оның үстіне қаң­ғыбас иттер қаптап жүр. Түн түгіл, күн­діз үйден шығудан қалдық. Бәріміз де бала-шаға бағып отырмыз ғой.

– Краснояр ауылындағы оқиғаның орнына бірден жеттік, – дейді қалалық полиция басқармасының инспекторы Алтынбек Бүкенов. – Қабаған иттер­дің иесін тауып, әкімшілік жауап­кер­ші­лік­ке тарттық.

Бірақ мұнымен мәселе түпкілікті шешіле қоймайтындығы белгілі. Ендігі арада қала әкімдігі қаңғыбас иттердің қа­терін қаперге алып, нақты бір шара қол­дану қажет тәрізді.

Көкшетау