Полиция жолшыларды сотқа берді
<p style="text-align: justify;">Батыс Қазақстан облыстық Ішкі істер департаменті жол сапасын жақсартуға бай­ла­ныс­­ты бұған дейін беріл­ген ұсы­нымхаттарды орын­дама­ғаны үшін «Қазақавтожол» меке­ме­сіне қатысты 2 хаттама тол­тырып, материалдарды сот­қа жолдады.</p>
Полицияның хабарлауынша, облыс аумағында ауа райының қолайсыздығынан 16 мәрте жол-көлік оқиғасы болып, көлік иелері материалдық шығынға батқан. Жолдың сапасына жауап беретін 17 лауазымды тұлғаның әкімшілік жауапкершілікке тартылғаны белгілі болды. Одан бөлек, халықаралық және республикалық маңызы бар жолдарды қар мен мұздан тазарту жөніндегі ұйғарымды уақытында орындамағаны үшін «Қазақавтожол» мекемесінің облыстық филиалына қатысты іс Орал қалалық мамандандырылған әкімшілік сотына жолданған.
Батыс Қазақстан облысы аумағында республикалық маңызы бар жолдардың ұзындығы – 1414 км. Осы жолды биыл күтіп ұстауға республикалық бюджеттен 850 млн теңге бөлінген.
Соңғы күндері облыс аумағында жаңбыр жауып, тұман түсіп, жол қатынасы қиындады. 1 ақпан күні Орал-Атырау тас жолында Лада Ларгус және Datsun автокөліктері бір-біріне соғылып, 7 адам Ақжайық аудандық ауруханасына жатқызылған.
3 ақпан күні облыста қалың тұман мен көктайғақ қатеріне байланысты төтенше жағдайлар департаменті хабарлама таратқан еді. Полиция автокөліктерді Орал қаласынан шығармай жатыр.
Батыс Қазақстан облысы